കോതമംഗലം : ദൈവസന്നിധിയിലേക്ക് വാങ്ങിപ്പോയ പരിശുദ്ധ യാക്കോബായ സുറിയാനി സഭയുടെ അങ്കമാലി ഭദ്രാസനം കോതമംഗലം മേഖലയിലെ വൈദികനും അലൈൻ സെൻ്റ് ജോർജ്ജ് യാക്കോബായ സുറിയാനി പള്ളിയുടെ മുൻ വികാരിയുമായ ഫാ. സെബി എൽദോ (37) അച്ചന് പരിശുദ്ധ സഭയും സമൂഹവും കണ്ണീരോടെ വിട നൽകി.
വെളുപ്പിന് കോതമംഗലം മൗണ്ട് സീനായ് അരമനയിൽ എത്തിച്ച അച്ചൻ്റെ മൃതദേഹത്തിൽ സമൂഹത്തിലെ നാനാതുറകളിൽ നിന്നുള്ളവർ ആദരാഞ്ജലികളർപ്പിച്ചു. തുടർന്ന് രാവിലെ 10 മണിക്ക് കോതമംഗലം മൗണ്ട് സീനായ് മോർ ബസ്സേലിയോസ് യാക്കോബായ സുറിയാനി അരമന കത്തീഡ്രൽ പള്ളിയിൽ ആരംഭിച്ച ശവസംസ്കാര ശുശ്രൂഷ തുടർന്ന് കോതമംഗലം മാർത്തോമൻ ചെറിയപള്ളി, വിശുദ്ധ മർത്തമറിയം യാക്കോബായ സുറിയാനി കത്തീഡ്രൽ വലിയപള്ളി എന്നിവിടങ്ങളിലെ നഗരി കാണിക്കൽ ശുശ്രൂഷകൾക്ക് ശേഷം ഇടവകയായ പിണ്ടിമന സെൻ്റ് ജോൺസ് യാക്കോബായ സുറിയാനി പള്ളിയിൽ കബറടക്ക ശുശ്രൂഷകൾ നടത്തി. ശുശ്രൂഷകൾക്ക് പരിശുദ്ധ യാക്കോബായ സുറിയാനി സഭയുടെ ശ്രേഷ്ഠ കാതോലിക്ക ആബൂൻ മോർ ബസ്സേലിയോസ് തോമസ് പ്രഥമൻ ബാവായും മെത്രാപ്പോലീത്തൻ ട്രസ്റ്റിയും കാതോലിക്കാ അസിസ്റ്റൻ്റുമായ മോർ ഗ്രീഗോറിയോസ് ജോസഫ് മെത്രാപ്പോലീത്തയും കാർമികത്വവും അങ്കമാലി ഭദ്രാസന സഹായ മെത്രാപ്പോലീത്ത മോർ സേവേറിയോസ് എബ്രഹാം, കണ്ടനാട് ഭദ്രാസനത്തിൻ്റെ മോർ ഈവാനിയോസ് മാത്യൂസ്, കോതമംഗലം ഹൈറേഞ്ച് മേഖലകളുടെ മോർ യൂലിയോസ് ഏലിയാസ്, പെരുമ്പാവൂർ മേഖലയുടെ മോർ അഫ്രേം മാത്യൂസ്, മൂവാറ്റുപുഴ മേഖലയുടെ മോർ അന്തിമോസ് മാത്യൂസ്, മൈലാപ്പൂർ- ബാംഗ്ലൂർ ഭദ്രാസനങ്ങളുടെ മോർ ഒസ്താത്തിയോസ് ഐസക്, ഡൽഹി ഭദ്രാസനത്തിൻ്റെ മോർ യൗസേബിയോസ് കുര്യാക്കോസ് തുടങ്ങിയ മെത്രാപ്പോലീത്തന്മാർ സഹകാർമികത്വവും വഹിച്ചു. ശുശ്രൂഷകളിൽ പരിശുദ്ധ സഭയിലെ വന്ദ്യരായ റമ്പാൻമാരും വൈദികരും ശെമ്മാശൻമാരും വിശ്വാസികളും സംബന്ധിച്ചു.
ബഹു. അച്ചൻ അർബുദ രോഗത്തെ തുടർന്ന് കുറച്ചുനാളുകളായി വെല്ലൂർ സി.എം.സി ആശുപത്രിയിൽ ചികിത്സയിലായിരുന്നു. അവിടെ അച്ചനെ ശുശ്രൂഷിച്ച ഡോക്ടർമാർ, നേഴ്സസ്, ഓഫീസ് സ്റ്റാഫുകൾ, വെല്ലൂർ സാന്ത്വന സെൻ്ററിൻ്റെ ചുമതല വഹിക്കുന്ന മോർ അലക്സന്ത്രയോസ് തോമസ് മെത്രാപ്പോലീത്ത, ബഹു. വൈദിക ശ്രേഷ്ഠർ തുടങ്ങി അച്ചനുവേണ്ടി പ്രാർത്ഥിച്ചവരും സഹായിച്ചവരുമായി എല്ലാവരോടുമുള്ള നന്ദി പരിശുദ്ധ യാക്കോബായ സുറിയാനി സഭക്ക് വേണ്ടിയും അച്ചൻ്റെ കുടുംബത്തിനു വേണ്ടിയും മോർ യൂലിയോസ് ഏലിയാസ് മെത്രാപ്പോലീത്ത രേഖപ്പെടുത്തി.
വലിയകുന്നേൽ എൽദോ, ലീല എന്നിവരുടെ മകനാണ് ഫാ. സെബി. ചെങ്കര കൊച്ചുകുടിയിൽ ജിൻസിയാണ് സഹധർമ്മിണി. സേബാ, സേറാ, സാറാ എന്നിവർ മക്കളാണ്. കുറുപ്പംപടി സെന്റ് മേരീസ് പള്ളി, കോതമംഗലം വി. മർത്തമറിയം കത്തീഡ്രൽ, കോതമംഗലം മാർത്തോമൻ ചെറിയ പള്ളി, പുന്നേക്കാട് സെന്റ് ജോർജ് പള്ളി , ഉരുളൻതണ്ണി സെന്റ് മേരീസ് പള്ളി, സെന്റ് ജെയിംസ് എം. എ.കോളജ് ചാപ്പൽ, അലൈൻ സെന്റ് ജോർജ് എന്നീ യാക്കോബായ സുറിയാനി പള്ളികളിൽ സേവനം അനുഷ്ഠിച്ചിട്ടുണ്ട്.
