കോതമംഗലം: ചാത്തമറ്റത്ത് വീടിനോട് ചേർന്നുള്ള തൊഴുത്തിൽ ചാരായം വാറ്റിയ പ്രതി അറസ്റ്റിൽ. ചാരായവും, നൂറ് ലിറ്റർ വാഷും വാറ്റ് ഉപകരണങ്ങളും പിടിച്ചെടുത്തു. ചാത്തമറ്റം ആവലുംതടത്തില്‍ ബിജു ( ഫോട്ടോ ബിജു-43) ആണ് അറസ്റ്റിലായത്. ലോക്ഡൗണ്‍ ആരംഭിച്ചശേഷം ചാത്തമറ്റം മേഖലയില്‍ ചാരായവില്‍പ്പന നടക്കുന്നതിനേക്കുറിച്ച് എക്‌സൈസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ നടത്തിയ റെയ്ഡിലാണ് പ്രതി പിടിയിലായത്.
പ്രതിയെ പിടികൂടാന്‍ തക്കസമയം കാത്തിരുന്ന എക്‌സൈസ് ഇന്നലെ മിന്നല്‍ പരിശോധന നടത്തുകയായിരുന്നു. പ്രിവന്റീവ് ഓഫിസര്‍ ജോയി വര്‍ഗീസിന്റെ നേതൃത്വത്തില്‍ കെ..എ.നിയാസ്, എം.എം.കെ.ഫൈസല്‍, പി.പി.അസൈനാര്‍, പി.ബി.ലിബു, പി.വി.ബിജു, കെ.കെ.വിനോദ്, കെ.എസ്.ബബീന,പി.ജെ.ചാക്കോ എന്നിവരടങ്ങുന്ന സംഘമാണ് റെയ്ഡ് നടത്തിയത്.പ്രതിയെ കോടതിയില്‍ ഹാജരാക്കി.
