കോതമംഗലം: ലോക ഹൃദയദിനത്തോടനുബന്ധിച്ച് സെന്റ് ജോസഫ്സ്
ധർമഗിരി ആശുപത്രിയുടെ നേതൃത്വത്തിൽ വിവിധ ബോധവൽക്കരണ പരിപാടികൾ സംഘടിപ്പിച്ചു. ഒരു ഹൃദയമിടിപ്പും നഷ്ടപ്പെടുത്തരുത് എന്ന സന്ദേശവുമായി നടന്ന ചടങ്ങ് സെന്റ് ജോർജ് കത്തീഡ്രൽ വികാരി ഫാ.ഡോ. മാത്യു കൊച്ചുപുരയ്ക്കൽ ഉദ്ഘാടനം ചെയ്തു. പ്രൊവിൻഷ്യൽ സുപ്പീരിയർ സിസ്റ്റർ അഭയ എംഎസ്ജെ അധ്യക്ഷത വഹിച്ചു. ആശുപത്രി അഡ്മിനിസ്ട്രേറ്റർ സിസ്റ്റർ ജോസ്മിൻ എംഎസ്ജെ ആമുഖ പ്രഭാഷണം നടത്തി.
ഇന്റർവെൻഷണൽ കാർഡിയോളജിസ്റ്റ് ഡോ. പോൾ ഡാനി മുഖ്യപ്രഭാഷണം നടത്തി.മെഡിക്കൽ സൂപ്രണ്ട് ഡോ. ബിജു ചാക്കോ,ഹോസ്പിറ്റൽ സെക്രട്ടറി അഡ്വ. മാത്യു ജോസഫ്, വാർഡ് കൗൺസിലർ ഷിബു കുര്യാക്കോസ് എന്നിവർ പ്രസംഗിച്ചു.
ഹൃദയാരോഗ്യ ബോധവൽക്കരണത്തിന്റെ ഭാഗമായി സെന്റ് ജോസഫ്സ് ധർമഗിരി ആശുപത്രിയിൽ നിന്ന് കെ.എസ്.ആർ.ടി.സി ജംഗ്ഷനിലേക്ക് നടത്തിയ വാക്കത്തോൺ ഷിബു തെക്കുംപുറം എംഎൽഎ ഫ്ലാഗ് ഓഫ് ചെയ്തു.
വാക്കത്തോണിന് ശേഷം മുനിസിപ്പൽ ചെയർപേഴ്സൺ ഭാനുമതി രാജു പ്രമേയം അവതരണം നടത്തി. ഹൃദയാരോഗ്യത്തെക്കുറിച്ചുള്ള ബോധവൽക്കരണം ചീഫ് ഇന്റർവെൻഷണൽ കാർഡിയോളജിസ്റ്റ് ഡോ. മനോജ് തോമസ് നൽകി. കോതമംഗലം പോലീസ് സർക്കിൾ ഇൻസ്പെക്ടർ പി.ജെ. കുര്യാക്കോസ് ഹൃദയ ദിന സന്ദേശത്തിന്റെ പ്രതീകാത്മകമായി ബലൂൺ റിലീസ് നിർവഹിച്ചു. സെ. ജോസഫ്സ് കോളേജ് ഓഫ് നഴ്സിംഗ് വിദ്യാർത്ഥികൾ അവതരിപ്പിച്ച ഫ്ലാഷ് മോബും ജനശ്രദ്ധ നേടി.
ഹൃദയദിന സന്ദേശം കൂടുതൽ ജനങ്ങളിലെത്തിക്കുന്നതിന്റെ ഭാഗമായി കോതമംഗലം മേഖലയിലെ ഒൻപത് പഞ്ചായത്തുകളിലൂടെയും നഗരസഭ പ്രദേശങ്ങളിലൂടെയും സന്ദേശ വാഹനം പര്യടനം നടത്തി. രാവിലെ മുതൽ രാത്രി 8 വരെ സഞ്ചരിച്ച സന്ദേശ വാഹനം വഴി ഹൃദയാരോഗ്യ സംരക്ഷണം, ഹൃദ്രോഗ പ്രതിരോധം, ആരോഗ്യകരമായ ജീവിതശൈലി എന്നിവയെക്കുറിച്ചുള്ള ബോധവൽക്കരണ സന്ദേശങ്ങൾ പൊതുജനങ്ങളിലെത്തിച്ചു.
