കോതമംഗലം : നിർദ്ധനരെ ചേർത്തുപിടിക്കാനും ആവശ്യഘട്ടങ്ങളിൽ സഹായമെത്തിക്കാനും ഓരോ കമ്യൂണിസ്റ്റുകാരനും മുന്നോട്ട് വരണമെന്നത് കാലഘട്ടത്തിൻ്റ ആവശ്യമായി കാണണമെന്ന്
മുൻ എം എൽ എ എൽദോ എബ്രഹാം ആഹ്വാനം ചെയ്തു.
സി പി ഐ കോതമംഗലം ലോക്കൽ കമ്മിറ്റി യുടെ നേതൃത്വത്തിൽ ഓണാഘോഷത്തോടനുബന്ധിച്ച് മുതിർന്ന അംഗങ്ങൾക്ക് ഓണക്കോടിയും ഓണകൈനീട്ടവും നൽകി ആദരിക്കൽ ഉദ്ഘാടനം ചെയ്യുകയായിരുന്നു എൽദോ എബ്രഹാം.
മുതിർന്ന പാർട്ടി സഖാക്കളുടെ പ്രവർത്തന പരിചയവും അനുഭവ സമ്പത്തും പാർട്ടിക്ക് കരുത്തുപകരുന്നതാക്കാനുള്ള ഇടപെടുലുകളുണ്ടാകണം. പ്രായവും രോഗവും ബാധിച്ചവർക്കു നേരെ കാരുണ്യത്തിൻ്റെ കൈകൾ നീട്ടാൻ ആർദ്രതയുള്ള മനസുകളുടെ ഉടമയായ കമ്യൂണിസ്റ്റുകാരൻ്റെ ജീവിതം സമർപ്പിക്കണം.ജനകീയ അംഗീകാരം നേടാൻ പാർട്ടി പ്രവർത്തനത്തിൽ കാലാനുസൃതമായ മാറ്റം അനിവാര്യമാണ്. ക്യാൻസർ അടക്കമുളള രോഗങ്ങൾ ബാധിച്ചവർക്ക് പാലിയേറ്റീവ് സഹായവും കിഡ്നി രോഗം ബാധിച്ചവർക്ക് ഡയാലിസിനുള്ള സംവിധാനവും
ഒരുക്കാൻ തയാറാകണം. വേദനിക്കുന്നവനെ സഹായിക്കുകയും സ്നേഹിക്കുകയും ചെയ്യുന്ന ഉത്തമ കമ്യൂണിസ്റ്റായി മാറാൻ നാം ഓരോരുത്തരും ശ്രദ്ധ പുലർത്തണമെന്നും എൽദോ എബ്രഹാം ആഹ്വാനം ചെയ്തു.
ജന ജീവിതത്തെ ബാധിക്കുന്ന പൊതു ആവശ്യങ്ങൾക്കായി നിലകൊള്ളാനും പ്രതിഷേധ സമരങ്ങൾക്ക് നേതൃത്വം നൽകാനും കഴിയുന്നതോടൊപ്പം
കാരുണ്യ പ്രവർത്തനങ്ങൾക്കും സമയം കണ്ടെത്തണമെന്നും അദ്ദേഹം പറഞ്ഞു. കോതമംഗലം ലോക്കൽ അതിർത്തിയിൽ നിന്നുള്ള മുതിർന്ന അംഗങ്ങൾ ഓണക്കോടിയും ഓണകൈനീട്ടവും എൽദോ എബ്രഹാമിൽ നിന്നും ഏറ്റുവാങ്ങി.
സി പി ഐ കോതമംഗലം ലോക്കൽ സെക്രട്ടറി അഡ്വ. മാർട്ടിൻസണ്ണി അദ്ധ്യക്ഷത വഹിച്ചു. മണ്ഡലം സെക്രട്ടറി പി റ്റി ബെന്നി, ജില്ലാ കൗൺസിൽ അംഗം എം കെ രാമചന്ദ്രൻ, വർഗ ബഹുജന സംഘടന നേതാക്കളായ എം എസ് ജോർജ്, പി എം ശിവൻ, പി എ അനസ്, റ്റി എച്ച് നൗഷാദ്, എം എസ് അലിയാർ , നിതിൻ കുര്യൻ, എ എം ജോയി,
ഷിബു കെ ജെ, പി ജി അനിൽകുമാർ, സിറിൻ ദാസ്, ഗീത രാജേന്ദ്രൻ, സുമ ശിവൻ, കെ എ സൈനുദ്ദീൻ എന്നിവർ പ്രസംഗിച്ചു. അഡ്വ. സി കെ ജോർജ് സ്വാഗതവും സിജോ വർഗീസ് നന്ദിയും പറഞ്ഞു.
