കൊച്ചി : ഒരു വർഷം പിന്നിടുമ്പോഴും കോവിഡ് മഹാമാരി കെട്ടടങ്ങാത്ത സാഹചര്യത്തിൽ കോവിഡ് പ്രതിരോധ ശില്പം തീർത്തു വ്യത്യസ്തനാകുകയാണ് പ്രശസ്ത ശില്പിയും, കലാകാരനുമായ ഡാവിഞ്ചി സുരേഷ്. കൊടുങ്ങല്ലൂർ, അഴീക്കോട്‌ മുനക്കല്‍ ബീച്ചില്‍ മുസിരീസ് പ്രോജക്റ്റിന്‍റെ ഭാഗമായിട്ടാണ് കോവിഡ് പ്രതിരോധ ശില്പം തീർത്തത്. സാധാരണ നിലയിലേയ്ക്ക് മടങ്ങിവരാന്‍ ഇനി എന്ന് നമ്മുടെ ലോകത്തിനു കഴിയും എന്ന ചോദ്യ ചിഹ്നമാണ് ശില്പത്തിന്റെ നട്ടെല്ലായി ഡാവിഞ്ചി രൂപപെടുത്തിയിരിക്കുന്നത്. ചെവികളില്‍ തൂങ്ങിക്കിടക്കുന്ന മാസ്ക്കിനുള്ളില്‍ മറഞ്ഞിരിക്കുന്ന വേദനയാര്‍ന്ന മനുഷ്യ മുഖത്തിന്‍റെ പ്രതീക്ഷകള്‍ക്ക് സുരക്ഷതന്നെയാണ് മുഖ്യമായ പ്രതിരോധം എന്നോര്‍മ്മപ്പെടുത്തുകയാണ്ഈ ശില്പം.അത് തന്നെയാണ് മുന്നോട്ടുവെക്കുന്ന ആശയവും. ചോദ്യചിഹ്നത്തിന്‍റെ അടിയിലെ കുത്തായി ലോകത്തിന്‍റെ മാതൃകയും ഉള്‍ക്കൊള്ളിച്ചിട്ടുണ്ട് ഈ കലാകാരൻ.
ചൈനയില്‍ നിന്നും പൊട്ടിപുറപ്പെട്ട മഹാമാരിയെ സൂചിപ്പിച്ചു കൊണ്ട് തലയുടെ പിന്നില്‍ ചൈനീസ് ഡ്രാഗന്‍റെ മുള്ളുകളും ഉള്‍പ്പെടുത്തിയിരിക്കുന്നു. പത്തടി ഉയരമുള്ള ശില്പം ഒരാഴ്ചയോളം സമയമെടുത്താണ് നിർമ്മിച്ചിരിക്കുന്നത്. ഇരുമ്പ് കമ്പികളും, തകിടും, ഫൈബറും ആണ് ഈ കോവിഡ് പ്രതിരോധ ശില്പ നിർമാണത്തിന് ഉപയോഗിച്ചിരിക്കുന്നത്.
പുതിയ ശില്പം അഴീക്കോട്‌ മുനക്കല്‍ ബീച്ചില്‍ വരുന്നവര്‍ക്ക് ആസ്വദിക്കുവാനും ആശയമുൾക്കൊള്ളുവാനും മുസിരീസ് പ്രോജക്റ്റ് അവസരമൊരുക്കുകയാണ്.
ഏപ്രിൽ ഒന്നിന് കോവിഡ് പ്രതിരോധ ശിൽപം ജനങ്ങൾക്കായി സമർപ്പിക്കുമെന്ന് ഡാവിഞ്ചി സുരേഷ് പറഞ്ഞു.കഴിഞ്ഞ വര്‍ഷം മാര്‍ച്ചിലാണ് ജാഗ്രതാ ശില്പം ഉണ്ടാക്കി കോവിഡ് പ്രതിരോധത്തിന്‍റെ പ്രവര്‍ത്തനങ്ങള്‍ക്ക് ഡാവിഞ്ചി തുടക്കമിടുന്നത് .തുടര്‍ന്ന് മാര്‍ച്ച് 24 നു ലോക്ഡൌണ് പ്രഖ്യാപിച്ചതോടെ ദിവസവും തുടര്‍ച്ചയായി കോവിഡ്മായി ബന്ധപ്പെട്ട ചിത്രങ്ങള്‍ വരക്കാന്‍ തുടങ്ങി ഇദ്ദേഹം.
63 ദിവസങ്ങള്‍ കൊണ്ട് 63 കോവിഡ് ബോധവല്‍ക്കരണ ചിത്രങ്ങള്‍ വരച്ചു. പിന്നീട് കാര്‍ട്ടൂണ്‍ അക്കാദമിയും കേരള സാമൂഹ്യ സുരക്ഷാ മിഷനും ചേര്‍ന്ന് ലോക്ഡൌണ് സമയത്ത് കേരളത്തിലെ എല്ലാ ജില്ലകളിലും നടത്തിയ കാര്‍ട്ടൂണ്‍ മതിലില്‍ പങ്കെടുത്തു കൊണ്ട് സുരേഷ് കാര്‍ട്ടൂണുകള്‍ വരച്ചു കൂട്ടി . അതിജീവനവുമായി ബന്ധപ്പെട്ട ഷോര്‍ട്ട് ഫിലിമുകളിലും ആല്‍ബത്തിലും ഈ കലാകാരൻ അഭിനയിച്ചു. വര്‍ഷം ഒന്ന് കഴിഞ്ഞിട്ടും കോവിഡ് കാലം അവസാനിക്കാത്ത സാഹചര്യത്തിലാണ് ഈ പ്രതിരോധ ശില്പത്തിന്റെ നിർമ്മിതി. കോവിഡ്കാലത്തിന്റെ മങ്ങാത്ത ഓർമക്കായി.
