കോതമംഗലം: രോഗം മറച്ചുവെച്ചെന്ന് കാരണം പറഞ്ഞ് നിഷേധിച്ച ആരോഗ്യ ഇന്ഷ്വറന്സ് ക്ലെയിം ഉപഭോക്തൃ കോടതിയില് കേസ് ഫയല് ചെയ്തതിനെ തുടര്ന്ന് പരാതിക്കാരന് അനുവദിച്ചു. കോതമംഗലം പിണ്ടിമന സ്വദേശി ബിജു മാത്യുവിന് കോതമംഗലത്തെ സ്വകാര്യ ആശുപത്രിയിലെ ചികിത്സയ്ക്ക് ചെലവായ 85, 850 രൂപ ന്യൂ ഇന്ത്യ അഷ്വറന്സ് കമ്പനിയില് ക്ലെയിമിന് അപേക്ഷിച്ചപ്പോള് പോളിസി എടുത്തപ്പോള് ഹെര്ണിയ രോഗം മറച്ചുപിടിച്ചു എന്ന കാരണം പറഞ്ഞ് നിരസിച്ചു.
തുടര്ന്ന് എറണാകുളം ജില്ലാ ഉപഭോക്തൃ കോടതിയില് ഓഥറൈസ്ഡ് കണ്സ്യൂമര് റെപ്രസെന്റേറ്റീവ് ഗോപാലന് വെണ്ടുവഴി മുഖേന കേസ് ഫയല് ചെയ്യുകയായിരുന്നു. നഷ്ടപരിഹാരവും കോടതി ചെലവും ഉള്പ്പെടെ 2,05,850 രൂപയ്ക്കാണ് കേസ് നല്കിയത്. കോടതിയിലെ ആദ്യത്തെ ഹിയറിംഗ് കഴിഞ്ഞപ്പോള്ത്തന്നെ ബിജു മാത്യുവിന്റെ ബാങ്ക് അക്കൗണ്ടിലേക്ക് അദ്ദേഹത്തിന്റെ അറിവോ സമ്മതമോ കേള്ക്കാതെ 79,655 രൂപ ഇന്ഷ്വറസ് കമ്പനി നിക്ഷേപിക്കുകയായിരുന്നു .
ഇതേ തുടര്ന്ന് കേസുമായി മുന്നോട്ടു പോകാന് താത്പര്യമില്ലാതിരുന്ന പരാതിക്കാരന് കേസ് പിന്വലിക്കാന് കോടതിയില് അപേക്ഷയും നല്കി.
