കോതമംഗലം: അധ്യാപനത്തോടൊപ്പം കൃഷിയെയും സ്നേഹിച്ച് അജിമോന്‍. എറണാകുളം എസ്ആര്‍വി ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ ഹിസ്റ്ററി അധ്യാപകനായ അജിമോന്‍ പൗലോസ് കോതമംഗലം കോഴിപ്പിള്ളി ഇലവംകുടി കുടുംബാംഗമാണ്. തന്റെ 45 സെന്റ് കൃഷിയിടത്തില്‍ റംബൂട്ടാന്‍, അബിയു, അവക്കാഡോ, സപ്പോര്‍ട്ട, ജംബൂട്ടിക, ചാമ്പ, നെല്ലി, സ്വീറ്റ് റൂബിക്ക, ബീര്‍ ആപ്പിള്‍ ,പ്ലാവ്, മാവ്, ബംബ്ലൂസ്, പുലാസാന്‍, ചെറുനാരകം, ഓറഞ്ച്, ആത്തക്ക, പേര, കടപ്ലാവ്, പപ്പായ, മുള്ളാത്ത, റൂബിക്ക, ഞാവല്‍ ഉള്‍പ്പെടെയുള്ള ഫലവൃക്ഷങ്ങളാണ് കൃഷി ചെയ്യുന്നത്. കൂടാതെ തെങ്ങ്, വാഴ, കുരുമുളക് എന്നിവയും കൃഷിയിടത്തില്‍ ഉള്‍പ്പെടുത്തിയട്ടുണ്ട്.
ഇടവിളകളായി ഇഞ്ചി, മഞ്ഞള്‍ എന്നിവയുമുണ്ട്. ജൈവ വളങ്ങളാണ് പ്രധാനമായും ഉപയോഗിക്കുന്നത്. നല്ല ഇനം ഗ്രാഫ്റ്റിംഗ് തൈകളാണ് കൃഷിക്കായി ഉപയോഗിച്ചിട്ടുള്ളത്.സ്‌കൂളിലെ നാഷണല്‍ സര്‍വീസ് സ്‌കീം മുന്‍ പ്രോഗ്രാം ഓഫീസര്‍ ആയി പ്രവര്‍ത്തിച്ചിട്ടുള്ള അജിമോന്‍ വിദ്യാര്‍ഥികളില്‍ കൃഷിയോടുള്ള താത്പര്യം സൃഷ്ടിക്കുന്നതിലേക്കായി ക്യാമ്പുകളില്‍ അടുക്കളത്തോട്ടം ഉള്‍പ്പെടുയുള്ള പ്രോജക്ടുകള്‍ സ്ഥിരമായി നടപ്പിലാക്കിയിരുന്നു. കെപിഎസ്ടിഎ അധ്യാപക സംഘടനയുടെ സംസ്ഥാന എക്‌സിക്യൂട്ടീവ് മെന്പറായ അജിമോന്‍ സംയുക്ത അധ്യാപക സമിതിയുടെ ജില്ലാ ചെയര്‍മാനുമാണ്.
