മൂവാറ്റുപുഴ:മേക്കടമ്പിലെ യൂസ്ഡ് കാര്‍ ഷോറൂം തീവെച്ച പുത്തന്‍കുരിശ് സ്വദേശി പ്രതി എബിന്‍ പോളുമായുള്ള തെളിവെടുപ്പ് പൂര്‍ത്തിയായി.
പ്രതി തീവെച്ച, എറണാകുളം കടവുംഭാഗം സിനഗോഗിന് മുമ്പിലും, തൃപ്പൂണിത്തുറയിലും തുടര്‍ന്ന് മേക്കടമ്പിലെ യൂസ്ഡ് കാര്‍ ഷോറൂമിലും, അമ്പലംപടിയിലുള്ള വീട്ടിലും എത്തിച്ചാണ് തെളിവെടുത്തത്. തിങ്കളാഴ്ചയാണ് പ്രതിയുടെ കസ്റ്റഡി കാലാവധി അവസാനിക്കുന്നത്. മാര്‍ച്ച് 18ന് പുലര്‍ച്ചെ മേക്കടമ്പ് എംഐഎന്‍ പള്ളിക്ക് സമീപം പ്രവര്‍ത്തിക്കുന്ന ‘മൈ കാര്‍’ യൂസ്ഡ് കാര്‍ ഷോറൂമിനും ‘ആന്‍സ് ബേക്കറിക്കും’ നേരെയായിരുന്നു ആക്രമണം നടത്തിയത്. പുലര്‍ച്ചെ 3.30ന് കാറിലെത്തിയ പ്രതി, ഷോറൂമില്‍ വില്‍പ്പനയ്ക്കായി നിര്‍ത്തിയിട്ടിരുന്ന ഇരുപതോളം കാറുകള്‍ ലക്ഷ്യമിട്ട് പെട്രോള്‍ ബോംബുകള്‍ എറിയുകയായിരുന്നു. ആക്രമണത്തിന്റെയും പ്രതിയുടെയും ദൃശ്യങ്ങള്‍ സ്ഥാപനത്തിലെ സിസിടിവി ക്യാമറകളില്‍ പതിഞ്ഞിരുന്നു. പ്രതിയുടെ വീട്ടില്‍ നടത്തിയ പരിശോധനയില്‍ 105 ഗ്രാം രാസലഹരിയും കണ്ടെത്തിയിരുന്നു. ഗുരുതര സ്വഭാവമുള്ള തീവെപ്പ് കേസില്‍ അഞ്ചു ദിവസത്തേക്ക് ആണ് പ്രതിയെ പോലീസ് കസ്റ്റഡിയില്‍ വിട്ടത്. ബോസ് ആരാണെന്ന് കണ്ടെത്താനായുള്ള തീവ്രശ്രമത്തിലാണ് പോലീസ്. അതിനിടെയാണ് ഞായറാഴ്ച വൈകിട്ട് മേക്കടമ്പിലെ യൂസ്ഡ് കാര്‍ ഷോറൂമില്‍ എത്തിച്ച് തെളിവെടുപ്പ് നടത്തിയത്.
