കോതമംഗലം : തീർത്ഥാടന കേന്ദ്രമായ മാർതോമ ചെറിയ പള്ളിയിൽ കന്നി 20 പെരുന്നാളിൻ്റെ പ്രധാന ആഘോഷദിനമായ ഇന്ന് പരിശുദ്ധ ബാവയുടെ കബർ വണങ്ങി അനുഗ്രഹം പ്രാപിക്കാൻ നാനാദിക്കിൽ നിന്നായി തീർത്ഥാടക ലക്ഷങ്ങൾ കോതമംഗലത്തേക്ക് ഇന്ന് പ്രവഹിക്കും. വിവിധ മേഖലകളിൽ നിന്ന് ദിവസങ്ങളായി പുറപ്പെട്ട് കാൽ നടയായി ഇന്നലെ സന്ധ്യയോടെ സമീപ പ്രദേശങ്ങളിലെ പള്ളികളിലെത്തി വിശ്രമിക്കുന്നവരും സമീപ താലൂക്കുകളിലുള്ള വിശ്വാസികളുമടക്കമുള്ളവർ അതാത് പള്ളികളിലെ പ്രഭാത സമസ്കാരത്തിന് ശേഷം കാൽ നട തീർത്ഥാടനം ആരംഭിക്കും ഉച്ചയോടെ നാനാ ദിക്കിൽ നിന്ന് കോതമംഗലത്തേക്കും ചെറിയ പള്ളിയിലേക്കും കാൽനട തീർത്ഥാടകരെത്തിത്തുടങ്ങും പിന്നീട് തീർത്ഥാടക സംഘങ്ങളുടെയും പരിശുദ്ധ ബാവയുടെ കബറിൻ്റെ ഛായ ചിത്രം ആലേഖനം ചെയ്ത രഥങ്ങളുടെയും അണമുറിയാത്ത പ്രവാഹമായിരിക്കും സന്ധ്യാ പ്രാർത്ഥനക്ക് മുമ്പേ തീർത്ഥാടക ലക്ഷങ്ങൾ കബറിങ്കലെത്തും.
നാനാ ജാതി മതസ്ഥരായ ആളുകൾ ദേശത്തിന്റെ വിവിധ ഭാഗങ്ങളിൽ നിന്ന് പള്ളിയിൽ വന്ന് ചേരും. വന്നു ചേരുന്ന എല്ലാ തീർത്ഥാടകർക്കും നേർച്ചക്കഞ്ഞി പള്ളിയങ്കണത്തിൽ പ്രത്യേകം തയ്യാറാക്കിയ പന്തലിൽ രാവിലെ 9 മുതൽ രാത്രി 10 വരെ വിതരണം ചെയ്യും. ഇന്ന് രാവിലെ നടത്തുന്ന വിശുദ്ധ മൂന്നിന്മേൽ കുർബ്ബാനക്ക് ഡോ. മാത്യൂസ് മാർ അന്തിമോസ് മെത്രാപോലീത്ത പ്രധാന കാർമ്മികത്വം വഹിക്കും. ഉച്ചകഴിഞ്ഞ് 3ന് മേമ്പൂട്ടിൽ നിന്നും പള്ളി ഉപകരണങ്ങളും 151 പൊൻ വെള്ളി കുരിശുകളും ആഘോഷപൂർവ്വം പള്ളിയകത്ത് കൊണ്ടു പോകും.
വിവിധ പ്രദേശങ്ങളിൽ നിന്നും എത്തിച്ചേർന്ന തീർത്ഥാടക സംഘത്തിന് പള്ളി കാര്യത്തിൽ നിന്നും സ്വീകരണം നൽകും. ഹൈറേഞ്ച് മേഖലയിൽ നിന്ന് എത്തുന്ന തീർത്ഥാടകരെ കോഴിപ്പിള്ളി കവലയിലും പടിഞ്ഞാറൻ മേഖല തീർത്ഥാടകരെ മുവാറ്റുപുഴ കവലയിലും, വടക്കൻ മേഖല തീർത്ഥാടരെ ഹൈറേഞ്ച് കവലയിലും പോത്താനിക്കാട് മേഖല തീർത്ഥാടകരെ ചക്കാലക്കുടി ചാപ്പലിലും സ്വീകരിക്കും.
വൈകീട്ട് 6.30ന് നടത്തുന്ന സന്ധ്യാ നമസ്കാരത്തിന് ശേഷ്ഠ കാതോലിക്ക മാർ ബസേലിയോസ് ജോസഫ് ബാവ പ്രധാന കാർമ്മികത്വം വഹിക്കും. രാത്രി പത്തിന് നഗരം ചുറ്റിയുള്ള പ്രദക്ഷിണം മർത്തമറിയം കത്തീഡ്രൽ വലിയ പള്ളി, സെന്റ് ജോർജ് കത്തീഡ്രൽ, മലയിൻകീഴ് കുരിശ്, എംബിഎംഎം ആശുപത്രി, ടൗൺ കുരിശ് എന്നിവിടങ്ങളിൽ കൂടി മാർ ബേസിൽ ഹയർ സെക്കൻഡറി സ്കൂൾ റോഡ് വഴി പള്ളിയിൽ തിരിച്ച എത്തി ചേർന്ന് ആശിർവാദത്തോടെ സമാപിക്കും.
