പെരുമ്പാവൂര്:നഗരസഭ ക്വാര്ട്ടേഴ്സ് സാമൂഹ്യവിരുദ്ധരുടെ താവളമായി മാറിയിട്ടും നഗരസഭാ ഭരണാധികാരികള് തിരിഞ്ഞുനോക്കാതെ ഗുരുതര അനാസ്ഥ കാണിക്കുന്നതില് പ്രതിഷേധം ശക്തമാകുന്നു. നഗരസഭ സെക്രട്ടറിക്കും നഗരസഭ എന്ജിനീയര്ക്കും താമസിക്കുന്നതിനായി എല്ലാവിധ സജ്ജീകരണങ്ങളോടുംകൂടിയ രണ്ട് ക്വാര്ട്ടേഴ്സുകളാണ് നിലവിലുള്ളത്. എന്നാല്, വര്ഷങ്ങളായി ക്വാര്ട്ടേഴ്സുകള് താമസക്കാര് ഇല്ലാതെ അനാഥമാണ്. നഗരസഭ എന്ജിനീയറിങ് വിഭാഗമോ, ആരോഗ്യവിഭാഗമോ ഈ പ്രദേശത്തേക്ക് തിരിഞ്ഞുപോലും നോക്കുന്നില്ല. കാടുപിടിച്ചുകിടക്കുന്നതുമൂലം രാത്രിയെന്നോ പകലെന്നോ വ്യത്യാസമില്ലാതെ സാമൂഹ്യവിരുദ്ധരും മയക്കുമരുന്നു കച്ചവടക്കാരും മയക്കുമരുന്ന് ഉപഭോക്താക്കളും ക്വാര്ട്ടേഴ്സുകള് കൈയേറി യഥേഷ്ടം ഉപയോഗിക്കുകയാണ്.
അതിഥിത്തൊഴിലാളികളും മയക്കുമരുന്നിന് അടിമകളായവരും സ്ഥിരതാവളമാക്കിയ സാഹചര്യത്തില് പ്രദേശവാസികള് ഭയപ്പാടോടെയാണ് കഴിയുന്നത്. രാത്രികാലങ്ങളില് ഇവിടെ വെളിച്ചമില്ലാത്തതുമൂലം കാല്നടക്കാര് വലിയ പ്രയാസമാണ് അനുഭവിക്കുന്നത്. ലക്ഷങ്ങള് ചെലവഴിച്ച് മോടിപിടിപ്പിക്കുകയും അറ്റകുറ്റപ്പണി പൂര്ത്തീകരിച്ച ക്വാര്ട്ടേഴ്സുകളിലെ ഇലക്ട്രിക് വയറിങ്ങുകളും പൈപ്പുകളും ടാപ്പുകളും എല്ലാം മോഷ്ടിക്കപ്പെട്ടിരിക്കുകയാണ്. ഇതൊന്നും നഗരസഭ ഭരണാധികാരികളുടെ ശ്രദ്ധയില് ഇതുവരെ പെട്ടിട്ടില്ല എന്നുള്ളത് വലിയ പ്രതിഷേധത്തിനാണ് ഇടയാക്കിയിട്ടുള്ളത്. ഉദ്യോഗസ്ഥര്ക്കായി അനുവദിക്കപ്പെട്ടിട്ടുള്ള ക്വാര്ട്ടേഴ്സ് അവര്ക്കാവശ്യമില്ലെങ്കില് സാമൂഹ്യവിരുദ്ധര്ക്ക് അഴിഞ്ഞാടാന് വിട്ടുകൊടുക്കാതെ മറ്റെന്തെങ്കിലും സംവിധാനം ഏര്പ്പെടുത്തണമെന്നാണ് ജനങ്ങളുടെ ആവശ്യം.
