കോതമംഗലം: സേവനമനുഷ്ടിച്ച സ്‌കൂളുകളിലും നാടുകളിലും കുട്ടികള്‍ക്കും രക്ഷിതാക്കള്‍ക്കും പ്രിയപ്പെട്ട സി. ഹെയിസ് ലെറ്റിന്റെ ആകസ്മിക വിയോഗം നാടിനെ ദുഖത്തിലാഴ്ത്തി. നിറപുഞ്ചിരിയോടെ സ്‌കൂളില്‍ കുട്ടികളുടെ പാഠ്യ പാഠ്യേതര വിഷയങ്ങളില്‍ ഒപ്പമുണ്ടായിരുന്ന പ്രിയപ്പെട്ട സിസ്റ്റര്‍ രക്ഷിതാക്കള്‍ക്കും സുപരിചിതമായിരുന്നു. പഠിപ്പിക്കുന്ന സ്‌കൂളുകളില്‍ സാമ്പത്തിക ബുദ്ധിമുട്ട് അനുഭവിക്കുന്ന കുട്ടികളെ കണ്ടെത്തി പാഠ്യോപകരണങ്ങള്‍ വാങ്ങുന്നതിനും ചികിത്സക്കും, വീട് നവീകരണത്തിന് ഫണ്ട് സ്വരൂപിച്ച് നല്‍കുനല്‍കുന്നതും ഉള്‍പ്പെടെയുള്ള ചാരിറ്റി പ്രവര്‍ത്തനങ്ങളില്‍ മുന്നില്‍ നിന്നിരുന്ന സിസ്റ്റര്‍ നാട്ടുകാര്‍ക്കും പ്രിയപ്പെട്ടവളായിരുന്നു. വെളിയേല്‍ച്ചാല്‍ സെന്റ് ജോസഫ്, കോതമംഗലം സെന്റ് ജോര്‍ജ്, ഊന്നുകല്‍ ലിറ്റില്‍ ഫ്‌ലവര്‍ എന്നീ ഹൈസ്‌കൂളുകളില്‍ സേവനം അനുഷ്ടിച്ചു.
6 വര്‍ഷം ഊന്നുകല്‍ ടൈനി ടോട്ട്‌സ് കിന്റര്‍ ഗാര്‍ട്ടന്‍ മാനേജരുമായിരുന്നു. കുട്ടികളെ കലോല്‍സവങ്ങള്‍ക്ക് ഒരുക്കുന്നതിനും സ്‌കൗട്ട് ആന്റ് ഗൈഡ്, സ്റ്റുഡന്‍സ് പോലീസ് കേഡറ്റ് എന്നിവയുടെയും ചുമതലകള്‍ വഹിച്ച് കുട്ടികള്‍ക്കിടയില്‍ പ്രവര്‍ത്തിച്ചു. കഴിഞ്ഞ അധ്യയന വര്‍ഷം അവസാനം ഊന്നുകല്‍ ലിറ്റില്‍ ഫ്‌ലവര്‍ ഹൈസ്‌കൂളില്‍ നിന്നാണ് വിരമിച്ചത്. രണ്ട് വര്‍ഷമായി അവിടെ സ്റ്റാഫ് സെക്രട്ടറി ആയിരുന്നു.
വിരമിച്ച ശേഷം ആത്മീയ രംഗത്ത് സജീവമായിരുന്നു. ദീര്‍ഘകാലം കെസിവൈഎം കോതമംഗലം രൂപത അനിമേറ്ററായി സേവനം ചെയ്തു. മികച്ച വാഗ്മി കൂടിയായ സിസ്റ്റര്‍ നിലവില്‍ കെസിവൈഎം, യുവദീപ്തി, മാത്യവേദി സംഘടനകള്‍ക്ക് ക്ലാസുകള്‍ എടുത്തും, വചന പ്രഘോഷണങ്ങള്‍ നടത്തിയും വരികയായിരുന്നു. സിസ്റ്ററിന്റെ ആകസ്മിക മരണം എസ്ഡി സന്യാസിനി സമൂഹത്തിന് മാത്രമല്ല. നാടിനും വലിയ ദുഃഖവും നഷ്ടവുമാണ് ഉണ്ടാക്കിയിട്ടുള്ളത്.
ഡോര്‍ തുറന്നിട്ട് അശ്രദ്ധമായി നടത്തിയ സര്‍വ്വിസ് ജീവനെടുത്തു.
ബസ്സ് ജീവനക്കാര്‍ ഡോര്‍ തുറന്നിട്ട് നടത്തിയ അശ്രദ്ധമായ സര്‍വ്വിസ് കന്യാസ്ത്രിയുടെ ജീവനെടുത്തു. വാഴക്കുളത്ത് നിന്ന് കോതമംഗലത്തേക്ക് വരികയായിരുന്ന സ്വകാര്യബസ്സില്‍ അപകടം നടക്കുന്നസ്ഥലത്തിന് രണ്ട് സ്റ്റോപ്പ് മുന്‍പ് ബോയിസ് ടൗണ്‍ സ്റ്റോപ്പില്‍ നിന്നാണ് സി. ഹെയ്സ് ലെറ്റ് ബസ്സില്‍ കയറിയത്. ഒരു കിലോമീറ്റര്‍ ദൂരം പിന്നിടും മുമ്പാണ് അപകടം. അപകടത്തിന് തൊട്ടുമുന്‍പ് ഡോര്‍ തുറന്നിട്ട് ബസ് സഞ്ചരിക്കുന്ന സിസിടിവി ദൃശ്യങ്ങളും പോലീസിന് ലഭിച്ചിട്ടുണ്ട്.
ഈ സമയം ഒരു പുരുഷ യാത്രക്കാരന്‍ ബസ്സിന്റെ മുന്‍ ഡോറില്‍ അശ്രദ്ധമായി മൊബൈല്‍ ഫോണ്‍ ഉപയോഗിച്ച് നിന്ന് യാത്ര ചെയ്യുന്ന ദൃശ്യവും ക്യാമറയില്‍ പതിഞ്ഞിട്ടുണ്ട്. ഇയാള്‍ ബസ്സിനുള്ളിലേക്ക് പ്രവേശിക്കുന്നതിനിടെയാകാം ബസ്സ് വളവ് തിരിഞ്ഞത്. ഈ സമയം ആള്‍ക്ക് അടത്തേക്ക് പ്രവേശിക്കാനായി തിരക്കില്‍ നിന്നയാത്രക്കാര്‍ തിക്കിതിരക്കിയപ്പോള്‍ സിസ്റ്റര്‍ കൈപിടിച്ചിരുന്നത് പിടിത്തം വിട്ട് പോയിട്ടുണ്ടാവാം.
ബസ്സിന്റെ ഡോര്‍ അടച്ചിരുന്നെങ്കില്‍ ജീവന്‍ നഷ്ടമാകില്ലായിരുന്നു. പോലീസും മോട്ടോര്‍ വാഹന വകുപ്പ് ഉദ്യോഗസ്ഥരും ക്യാമറ കണ്ണുകളുമായി പരിശോധന ശക്തമാക്കിയില്ലെങ്കില്‍ ഇനിയും ജീവനുകള്‍ പൊലിയാനിടയാകും.
ബസ്സിനും ജീവനക്കാര്‍ക്കുമെതിരെ നടപടി.
അപകടത്തെ തുടര്‍ന്ന് ബസ് കസ്റ്റഡിയിലെടുത്ത് പോലീസ് ജീവനക്കാര്‍ക്കെതിരെ കേസെടുത്തു. ഡ്രൈവറുടെ ലൈസന്‍സ് സസ്‌പെന്‍ഡ് ചെയ്യുമെന്നും ഉദ്യോഗസ്ഥരുടെ റിപ്പോര്‍ട്ടിന്റെ അടിസ്ഥാനത്തില്‍ ബസിന്റെ പെര്‍മിറ്റ് സസ്‌പെന്‍ഡ് ചെയ്യാന്‍ ആര്‍ടിഎ ബോര്‍ഡിലേക്കു ശുപാര്‍ശ നല്‍കുമെന്നും ജോയിന്റ് ആര്‍ടിഒ അറിയിച്ചു.
