കോതമംഗലം: കേരള ഹോട്ടൽ ആന്റ് റസ്റ്റോറന്റ് അസോസിയേഷൻ എറണാകുളം ജില്ലാ കമ്മിറ്റിയുടെ ആഭിമുഖ്യത്തിൽ നടക്കുന്ന ഹൈജീൻ മോണിറ്ററിംഗ് സ്ക്വാഡ് കോതമംഗലത്ത് പരിശോധന നടത്തി. മുനിസിപ്പൽ ചെയർപേഴ്സൺ ഭാനുമതി രാജു ഉദ്ഘാടനം നിർവ്വഹിച്ചു.
യൂണിറ്റ് വർക്കിംഗ് പ്രസിഡന്റ് കെ കെ അശോകൻ അധ്യക്ഷത വഹിച്ചു മുൻസിപ്പൽ ആരോഗ്യ സ്ഥിരം സമിതി ചെയർപേഴ്സൺ സിന്ധു ജിജോ , ഹെൽത്ത് ഇൻസ്പെക്ടർ വി.വി സുരേഷ് എന്നിവർ ആരോഗ്യ പരിപാലന നിർദ്ദേശങ്ങൾ നൽകി. കെഎച്ച് ആർഎ എറണാകുളം ജില്ലാ പ്രസിഡന്റ് വി.ടി ഹരിഹരൻ മുഖ്യപ്രഭാഷണം നടത്തി. ജില്ലാ സെക്രട്ടറി കെ.ടി റഹിം, ഹൈജീൻ കമ്മിറ്റി ചെയർമാൻ ബൈജു പി. ഡേവിസ്,കൺവീനർ കെ.പി നാദിർഷ, യൂണിറ്റ് സെക്രട്ടറി സി. ജെ ബെന്നി, ആശാ ലില്ലി തോമസ് എന്നിവർ പ്രസംഗിച്ചു.
നൂറോളം സ്ഥാപനങ്ങളിൽ ഇന്ന് പരിശോധന നടത്തി, നാളെയും വിവിധ മേഖലകളിൽ പരിശോധന തുടരും. നിലവിൽ ജില്ലയിലെ എട്ടോളം ഭാഗങ്ങളിൽ ഇതിച്ചേർന്നിരുന്നു, അടുത്ത ദിവസങ്ങളിൽ പോത്തനിക്കാട്, മൂവാറ്റുപുഴ പെരുമ്പാവൂർ, മരട് തുടങ്ങി ഇരുപതോളം പ്രദേശങ്ങളിലേക്കും സ്ക്വാഡ് പരിശോധനക്കെത്തും.
ഹോട്ടലുടമകളെ ബോധവൽക്കരിക്കാൻ വ്യക്തമായ നിർദ്ദേശങ്ങളടങ്ങിയ ഫോമുകളുമായി സ്വന്തം സംഘടന തന്നെ ,ശുചിത്വം ഉറപ്പാക്കുന്ന ഈ പദ്ധതിയുമായി രംഗത്തിറങ്ങുകയായിരുന്നു.
