കോതമംഗലം :മാർ അത്തനേഷ്യസ് കോളേജ് അസ്സോസിയേഷൻ സ്ഥാപക സെക്രട്ടറി പ്രൊഫ. എം.പി. വർഗീസിന്റെ 104-ാം ജന്മവാർഷികം പ്രൗഢഗംഭീരമായി ആഘോഷിച്ചു. ജന്മവാർഷികാഘോഷത്തിൻ്റെ ഭാഗമായ അനുസ്മരണ സമ്മേളനം, ബസേലിയോസ് പൗലോസ് ഇൻഡോർ സ്റ്റേഡിയത്തിൽ മഹാത്മാഗാന്ധി സർവ്വകലാശാല വൈസ് ചാൻസർ (ഇൻ ചാർജ് ) പ്രൊഫ. ഡോ. ഡി. മാവൂദ് ഉദ്ഘാടനം ചെയ്തു.
വ്യത്യസ്ത തലങ്ങളിൽ തലമുറകളെ പ്രചോദിപ്പിക്കുന്ന മാതൃകയാണ് പ്രൊഫ. എം.പി വർഗ്ഗീസെന്ന് പ്രൊഫ. ഡി. മാവൂദ് അനുസ്മരിച്ചു. അസ്സോസിയേഷനും അതിന്റെ കീഴിലുള്ള സ്ഥാപനങ്ങൾക്കും അദ്ദേഹം നൽകിയ വിലമതിക്കാനാവാത്ത സംഭാവനകളെ സ്മരിക്കുകയും അദ്ദേഹത്തിന്റെ ഓർമ്മകൾക്ക് ആദരാഞ്ജലികൾ അർപ്പിക്കുകയും ചെയ്തു.
എം. എ. കോളേജ് അസ്സോസിയേഷൻ ചെയർമാൻ ഡോ. മാത്യൂസ് മാർ അപ്രേം അദ്ധ്യക്ഷനായിരുന്നു. മാർ അത്തനേഷ്യസ് കോളേജ് മുൻ പ്രിൻസിപ്പൽ പ്രൊഫ. എം. കെ. ബാബു, മാർ അത്തനേഷ്യസ് കോളേജ് അസ്സോസിയേഷൻ വൈസ് ചെയർമാൻ എ. ജി. ജോർജ് എന്നിവർ അനുസ്മരണ പ്രഭാഷണം നടത്തി. എം. എ. കോളേജ് പ്രിൻസിപ്പൽ ഡോ. മഞ്ജു കുര്യൻ,എഞ്ചിനിയറിംഗ്. കോളേജ് പ്രിൻസിപ്പൽ ഡോ. ബോസ് മാത്യു ജോസ് എന്നിവർ പ്രസംഗിച്ചു.
മാർ അത്തനേഷ്യസ് സ്ഥാപനങ്ങളിലെ അദ്ധ്യാപകർ, അനദ്ധ്യാപകർ, വിദ്യാർത്ഥികൾ, മാർ അത്തനേഷ്യസ് കോളേജ് അസ്സോസിയേഷൻ എക്സിക്യൂട്ടീവ്, ഗവേണിംഗ് ബോർഡ് അംഗങ്ങൾ, ഷെയർ ഹോൾഡേഴ്സ് തുടങ്ങിയവർ പങ്കെടുത്തു . രാവിലെ സെൻ്റ് ജെയിംസ് ചാപ്പലിൽ വിശുദ്ധ പത്രോസ്, പാലോസ് ശ്ലീഹന്മാരുടെ ഓർമ്മപ്പെരുന്നാളിനോടനുബന്ധിച്ച് നടന്ന വി. കുർബ്ബാനയ്ക്കു ശേഷമായിരുന്നു അനുസ്മരണ സമ്മേളനം.
