കോതമംഗലം: സാമൂഹിക, സാംസ്കാരിക, യുവജന ക്ഷേമ മേഖലകളിൽ അരനൂറ്റാണ്ടായി നിറസാന്നിധ്യമായ കോതമംഗലം വൈഎംസിഎയുടെ ഗോൾഡൻ ജൂബിലി ആഘോഷങ്ങൾ പ്രൗഢഗംഭീരമായ സമാപന സമ്മേളനത്തോടെ അവസാനിച്ചു. ചടങ്ങിനോടനുബന്ധിച്ച് നവീകരിച്ച വൈഎംസിഎ ഓഡിറ്റോറിയത്തിന്റെ ഉദ്ഘാടനവും കോതമംഗലം എംഎൽഎ ഷിബു തെക്കുംപുറത്തിനെ ആദരിക്കലും നടന്നു.
വൈഎംസിഎ പ്രസിഡന്റ് സലിം ചെറിയാന്റെ അധ്യക്ഷതയിൽ ചേർന്ന സമ്മേളനത്തിൽ മുൻ പ്രസിഡന്റ് പ്രൊഫ. ബേബി എം. വർഗീസ് മുഖ്യാതിഥികളെ പരിചയപ്പെടുത്തി. വൈഎംസിഎയുടെ ദേശീയ പ്രസിഡന്റ് റിട്ട. ജസ്റ്റിസ് കുര്യൻ ജോസഫ് ഗോൾഡൻ ജൂബിലി സമാപന സമ്മേളനം ഉദ്ഘാടനം ചെയ്തു. സമൂഹനന്മയ്ക്കും യുവജന ശാക്തീകരണത്തിനുമായി വൈഎംസിഎ നടത്തിയ പ്രവർത്തനങ്ങളെ അദ്ദേഹം അഭിനന്ദിച്ചു.
കോതമംഗലം എംഎൽഎ ഷിബു തെക്കുംപുറം നവീകരിച്ച വൈഎംസിഎ ഓഡിറ്റോറിയത്തിന്റെ ഉദ്ഘാടനം നിർവഹിച്ചു. പ്രദേശത്തിന്റെ സാമൂഹിക പുരോഗതിക്കും യുവജന പ്രവർത്തനങ്ങൾക്കും വൈഎംസിഎ നൽകിയ സംഭാവനകൾ അദ്ദേഹം അനുസ്മരിച്ചു. ചടങ്ങിൽ എംഎൽഎയെ സംഘടനയുടെ നേതൃത്വത്തിൽ ആദരിച്ചു.
വൈഎംസിഎ കേരള റീജിയൻ ട്രഷറർ അനിൽ ജോർജ് ഗോൾഡൻ ജൂബിലി സൊവെനീർ പ്രകാശനം ചെയ്തു. ഗോൾഡൻ ജൂബിലി സൊവെനീർ ചീഫ് എഡിറ്ററായ എഞ്ചീ. സണ്ണി കെ. തോമസ് സുവനീർ പ്രസന്റേഷൻ നടത്തി.ചടങ്ങിൽ എം.എസ്. എൽദോസ്, അഡ്വ. റ്റി ജെ. ജോർജ്, മിസ് ലീന റോയി, എൽദോ വർഗീസ്, ബേബി എം.യു, റോയ് എം ജോർജ്ജ് മിസ് ഡോൺസി റോയ് എന്നിവർ പ്രസംഗിച്ചു.
