കോതമംഗലം:നഗരസഭയുടെ ഹരിതകര്മസേനയിലെ രണ്ട് അംഗങ്ങള്ക്ക് എച്ച്1 എന്1 റിപ്പോര്ട്ട് ചെയ്തിട്ടും നഗരത്തിലെ രോഗപ്രതിരോധ പ്രവര്ത്തനങ്ങളില് ഗുരുതര അലംഭാവം തുടരുന്നു. മറ്റ് ഹരിതകര്മസേനാംഗങ്ങള്ക്ക് യഥാസമയം ചികിത്സയും കൈയുറയും മാസ്കുംപോലും നല്കാതെ അവഗണിക്കുകയാണെന്ന് പരാതി ഉയര്ന്നിട്ടുണ്ട്. കോതമംഗലം താലൂക്കില് അമീബിക് മസ്തിഷ്ക ജ്വരം, എച്ച്1 എന്1 എന്നിങ്ങനെ മരണങ്ങള് റിപ്പോര്ട്ട് ചെയ്ത സാഹചര്യത്തിലും വൈറല്പ്പനി, ഡെങ്കിപ്പനി, എലിപ്പനി തുടങ്ങി വകഭേദങ്ങള് പടര്ന്നുപിടിക്കുന്ന സമയത്തും നഗരസഭയുടെ നിയന്ത്രണത്തിലുള്ള താലൂക്കാശുപത്രിയുടെ പ്രവര്ത്തനം അവതാളത്തിലാണ്.
നഗരസഭയുടെ കീഴിലുള്ള ആശുപത്രി മാനേജ്മെന്റ് കമ്മിറ്റി നിര്ജീവമാണ്. ശനിയാഴ്ച ഒമ്പത് ഡോക്ടര്മാര് കൂട്ട അവധി എടുത്തിട്ടും നഗരസഭ ചെയര്പേഴ്സണോ മറ്റ് ജനപ്രതിനിധികളോ ഇടപെട്ടില്ല. നഗരവികസനത്തിന്റെ പേരില് നഗരസഭയുടെയും താലൂക്കാശുപത്രിയുടെയും മുന്നിലുള്ളഓട പൊളിച്ചിട്ട് ഒരുമാസം തികഞ്ഞു. ഇവിടെ വെള്ളം കെട്ടിക്കിടന്ന് ദുര്ഗന്ധം വമിക്കുകയാണ്. സ്വകാര്യ വ്യക്തി കൈയേറിയ സ്ഥലത്തെ ഓട പൊളിക്കാന് തയ്യാറാകാത്ത നഗരസഭയുടെ നടപടിയും വിവാദമായിട്ടുണ്ട്. വ്യക്തിക്ക് കോടതിയില്നിന്ന് സ്റ്റോപ്പ് മെമ്മോ ലഭിക്കാന് നഗരസഭ അവസരം ഒരുക്കിക്കൊടുത്തതായി മറ്റു വ്യാപാരികള് ആരോപണം ഉന്നയിച്ചിട്ടുണ്ട്.
