കോതമംഗലം: സ്ത്രീകളുടെയും ട്രാൻസ്ജെൻഡർ വിഭാഗങ്ങളുടെയും കുടുംബ ബഡ്ജറ്റിൽ വലിയ ആശ്വാസം സൃഷ്ടിക്കുന്ന പദ്ധതിയാണ് കെഎസ്ആർടിസി ബസുകളിലെ സൗജന്യ യാത്രാ പദ്ധതിയെന്ന് കോതമംഗലം എംഎൽഎ ഷിബു തെക്കുംപുറം പറഞ്ഞു.
യുഡിഎഫ് സർക്കാരിന്റെ പ്രകടനപത്രികയിൽ പ്രഖ്യാപിച്ച ഇന്ദിരാ ഗ്യാരണ്ടി പദ്ധതികളുടെ ഭാഗമായി നടപ്പാക്കുന്ന സൗജന്യ യാത്രാ പദ്ധതിയുടെ കോതമംഗലം ഡിപ്പോതല ഉദ്ഘാടനം കെഎസ്ആർടിസി ബസ് സ്റ്റാൻഡിൽ നിർവഹിച്ച് ഫ്ലാഗ് ഓഫ് ചെയ്ത ശേഷം സംസാരിക്കുകയായിരുന്നു അദ്ദേഹം.
യുഡിഎഫ് ജനങ്ങൾക്ക് നൽകിയ വാഗ്ദാനങ്ങൾ നടപ്പാക്കുന്നതിനുള്ള ശക്തമായ നടപടികളാണ് സർക്കാർ സ്വീകരിക്കുന്നതെന്നും, ഇന്ദിരാ ഗ്യാരണ്ടി പദ്ധതികളിലെ സുപ്രധാന തീരുമാനങ്ങളിലൊന്നായ സൗജന്യ യാത്രാ പദ്ധതി ആദ്യ മന്ത്രിസഭാ യോഗത്തിൽ തന്നെ അംഗീകരിച്ചതാണ് സർക്കാരിന്റെ പ്രതിബദ്ധത വ്യക്തമാക്കുന്നതെന്നും എംഎൽഎ പറഞ്ഞു.
പ്രതിദിനം ജോലിക്കും വിദ്യാഭ്യാസ ആവശ്യങ്ങൾക്കുമായി യാത്ര ചെയ്യുന്ന അനേകം സ്ത്രീകൾക്ക് ഈ പദ്ധതി സാമ്പത്തികമായി വലിയ പിന്തുണയാകുമെന്നും കുടുംബ ചെലവുകളിൽ ഗണ്യമായ ലാഭം കൈവരിക്കാൻ ഇത് സഹായിക്കുമെന്നും അദ്ദേഹം കൂട്ടിച്ചേർത്തു. പ്രകടനപത്രികയിൽ ഉൾപ്പെടുത്തിയിട്ടുള്ള മറ്റ് ജനക്ഷേമ പദ്ധതികളും ഘട്ടംഘട്ടമായി നടപ്പാക്കുമെന്നും അദ്ദേഹം വ്യക്തമാക്കി.
കോതമംഗലം ഡിപ്പോയിൽ നിന്ന് മുനിസിപ്പാലിറ്റിയിലെയും വിവിധ പഞ്ചായത്തുകളിലെയും യാത്രക്കാരെ ലക്ഷ്യമാക്കി 26 റൂട്ടുകളിലാണ് സൗജന്യ യാത്രാ പദ്ധതിയുടെ ഭാഗമായി സർവീസുകൾ നടത്തുന്നത്. ഇതിലൂടെ മേഖലയിൽ ദിനംപ്രതി യാത്ര ചെയ്യുന്ന ആയിരക്കണക്കിന് സ്ത്രീകൾക്കും ട്രാൻസ്ജെൻഡർ വിഭാഗങ്ങൾക്കും നേരിട്ടുള്ള പ്രയോജനം ലഭിക്കുമെന്നാണ് പ്രതീക്ഷ.
മുനിസിപ്പൽ ചെയർപേഴ്സൺ ഭാനുമതി രാജു അധ്യക്ഷത വഹിച്ചു. ജനപ്രതിനിധികളും വിവിധ രാഷ്ട്രീയ-സാമൂഹിക സംഘടനാ നേതാക്കളുമായ ജെസ്സി സാജു, ഷമീർ പനക്കൽ, ബാബു ഏലിയാസ്, കെ.പി. ബാബു, ഇബ്രാഹിം കവലയിൽ, മാത്യു ജോസഫ്, പി.കെ. മൊയ്തു, എ.ടി. പൗലോസ്, എം.എസ്. എൽദോസ്, അബു മൊയ്തീൻ, ഷിബു കുര്യാക്കോസ്, പി.എം. സക്കറിയ, പി.സി. ജോർജ്, ബാബു പോൾ, പി.എ.എം. ബഷീർ, സൗമ്യ ശശി, ജോമി തെക്കേക്കര, വിവിധ പഞ്ചായത്ത് പ്രസിഡന്റുമാർ, മുനിസിപ്പൽ കൗൺസിലർമാർ, വാർഡ് അംഗങ്ങൾ, ഭരണകക്ഷി സംഘടനാ നേതാക്കൾ, കോതമംഗലം കെഎസ്ആർടിസി യൂണിറ്റ് ഓഫീസർ നിജാമുദീൻ ജെ., ഇൻസ്പെക്ടർ എൻ.ആർ. രാജീവ്, സ്റ്റേഷൻ മാസ്റ്റർ റോയി എം.ബി., വെഹിക്കിൾ സൂപ്പർവൈസർ വിപിൻ എ.വി., ടി.ഡി.എഫ് പ്രസിഡന്റ് ഫ്രാൻസിറ്റി ചെറിയാൻ, സെക്രട്ടറി വി.പി. എൽദോസ്, ബിജു കെ.ആർ., ജയൻ സി.ആർ., കെഎസ്ആർടിസി ജീവനക്കാർ തുടങ്ങിയവർ ചടങ്ങിൽ പങ്കാളികളായി.
സൗജന്യ യാത്രാ പദ്ധതിയുടെ ഉദ്ഘാടനത്തോടനുബന്ധിച്ച് നടന്ന ചടങ്ങിൽ വലിയ ജനപങ്കാളിത്തമാണ് അനുഭവപ്പെട്ടത്. സ്ത്രീകളുടെ സാമൂഹികവും സാമ്പത്തികവുമായ ശാക്തീകരണത്തിന് പദ്ധതി വഴിയൊരുക്കുമെന്ന പ്രതീക്ഷയാണ് പരിപാടിയിൽ പങ്കെടുത്തവർ പങ്കുവെച്ചത്.
