കോതമംഗലം: കായികകേരളത്തിന്റെ തലസ്ഥാനമായ കോതമംഗലത്ത് വാഗ്ദാനം ചെയ്യപ്പെട്ട അന്താരാഷ്ട്ര സ്പോര്ട്സ് കോംപ്ലക്സ് നിര്മ്മാണം മുടങ്ങിയിട്ട് 15 വര്ഷമാകുന്നു. ചേലാട്ടിലെ ഗവണ്മെന്റ് പോളിടെക്നിക് കോളേജ് ഗ്രൗണ്ടും പിണ്ടിമന പഞ്ചായത്ത് ഏറ്റെടുത്ത് നല്കേണ്ട ഭൂമിയുമുള്പ്പെടെ 8 ഏക്കറിലാണ് പദ്ധതി ആസൂത്രണം ചെയ്തത്. 2006-2011 കാലത്തെ സര്ക്കാര് 25 കോടി രൂപ എസ്റ്റിമേറ്റില് അവതരിപ്പിച്ച പദ്ധതിക്കായി ആദ്യഘട്ടത്തില് 6 കോടി രൂപ അനുവദിച്ചിരുന്നു. 400 മീറ്റര് സിന്തറ്റിക് ട്രാക്ക്, ഫുട്ബാള് ഗ്രൗണ്ട്, ഗ്യാലറി, പരിശീലന കേന്ദ്രം, നീന്തല്ക്കുളം എന്നിവയുള്പ്പെട്ട കായിക സമുച്ചയത്തിന്റെ ഭൂമി നിരപ്പാക്കലും സംരക്ഷണഭിത്തി നിര്മ്മാണവും നേരത്തെ പൂര്ത്തിയായിരുന്നു.
ഇതിനുശേഷം തുടര്നടപടികളുണ്ടായില്ല. പിണ്ടിമന ഗ്രാമപഞ്ചായത്ത് 3.5 ഏക്കര് സ്ഥലം ഏറ്റെടുത്ത് കൈമാറുകയും 2016ല് വീണ്ടും ശിലാസ്ഥാപനം നടത്തുകയും ചെയ്തെങ്കിലും നിര്മ്മാണം പുനരാരംഭിച്ചില്ല. ചെലവഴിച്ച 6 കോടി രൂപയും സ്ഥലം ഏറ്റെടുക്കാന് പഞ്ചായത്ത് ചെലവിട്ട ലക്ഷങ്ങളും പാഴായ അവസ്ഥയിലാണ്.
മാറിമാറിവന്ന സര്ക്കാരുകളുടെ അനാസ്ഥമൂലം സ്പോര്ട്സ് കോംപ്ലക്സ് പദ്ധതിയുടെ പൂര്ത്തീകരണം അനിശ്ചിതത്വത്തിലാകുന്നു. കിഫ്ബി ഫണ്ട് അനുവദിച്ചെന്നും തടസങ്ങള് നീക്കി നിര്മ്മാണം ഉടന് ആരംഭിക്കുമെന്നുമുള്ള പ്രഖ്യാപനങ്ങള് ആവര്ത്തിക്കുമ്പോഴും പ്രായോഗിക നടപടികളുണ്ടാകുന്നില്ല. ഉന്നത ഉദ്യോഗസ്ഥസംഘങ്ങള് പലതവണ സ്ഥലസന്ദര്ശനം നടത്തിയെങ്കിലും പദ്ധതി എങ്ങുമെത്തിയില്ല.
നിര്വഹണച്ചുമതലയില്നിന്ന് കിറ്റ്കോയെ ഒഴിവാക്കി കായികവകുപ്പിന് കീഴിലുള്ള സ്ഥാപനത്തെ ഏല്പിച്ചെങ്കിലും നിര്മ്മാണപ്രവര്ത്തനങ്ങള് പുനരാരംഭിക്കാനായില്ല.ചേലാട് സ്പോര്ട്സ് കോംപ്ലക്സ് പദ്ധതി അട്ടിമറിക്കാന് തുടക്കംമുതല് ശ്രമം നടന്നിരുന്നു. കോതമംഗലം ടൗണില്നിന്ന് 5 കിലോമീറ്റര് മാറി പദ്ധതി നടപ്പാക്കുന്നതിനെ ചിലര് എതിര്ത്തു. പദ്ധതിക്കായി നീക്കിവച്ച സ്ഥലത്ത് പോളിടെക്നിക്ക് അധികൃതര് പുതിയ കെട്ടിടം നിര്മ്മിച്ചത് തിരിച്ചടിയായി. സ്ഥലലഭ്യത കുറഞ്ഞതോടെ ലക്ഷ്യമിട്ട സൗകര്യങ്ങളോടെ പദ്ധതി പൂര്ത്തിയാക്കാന് കഴിയാത്ത സ്ഥിതിയാണുള്ളത്.
ഈ സാഹചര്യത്തില് സ്പോര്ട്സ് കോംപ്ലക്സിന് പകരം ഫുട്ബാള് സ്റ്റേഡിയം മാത്രമായി പദ്ധതി ചുരുക്കാന് കായികവകുപ്പ് ആലോചിക്കുന്നു. പദ്ധതിക്ക് തടസമായി നിര്മ്മിച്ച കെട്ടിടം നോക്കുകുത്തിയായി തുടരുകയാണ്. സ്പോര്ട്സ് കോംപ്ലക്സ് പൂര്ത്തിയായിരുന്നെങ്കില് വമ്പന് കായികമാമാങ്കങ്ങള്ക്കും ഫുട്ബാള് മത്സരങ്ങള്ക്കും അത്ലറ്റിക് മീറ്റുകള്ക്കും ഇവിടം വേദിയാകുമായിരുന്നു. വളര്ന്നുവരുന്ന തലമുറയ്ക്ക് കായിക സ്വപ്നങ്ങള് പകര്ന്നുനല്കുന്നതിനൊപ്പം കായിക കേരളത്തിന്റെ തലസ്ഥാനമെന്ന പദവി ഉറപ്പിക്കാനും ഈ പദ്ധതിയിലൂടെ സാധിക്കുമായിരുന്നു.
