കോതമംഗലം: അടുത്ത വേനല്ക്കാലത്ത് പെരിയാര്വാലി കനാലുകളില് ജലലഭ്യത ഉറപ്പാക്കുന്നതിനുള്ള നടപടികള്ക്ക് തുടക്കമിട്ട് കോതമംഗലം ബ്ലോക്ക് പഞ്ചായത്ത്. കനാലുകളുടെ ശുചീകരണം തൊഴിലുറപ്പ് പദ്ധതിയില് ഉള്പ്പെടുത്താനാണ് തീരുമാനം. കീരമ്പാറ, കോട്ടപ്പടി, നെല്ലിക്കുഴി പഞ്ചായത്തുകളുടെ പരിധിയിലെ കനാലുകളുടെ ശുചീകരണമാണ് ഉള്പ്പെടുത്തുന്നത്. അടിത്തട്ടിലെ ചെളിയും മാലിന്യങ്ങളും നീക്കംചെയ്യുന്നതിനും കാട് വെട്ടുന്നതിനും തൊഴിലുറപ്പ് തൊഴിലാളികളെ നിയോഗിക്കും. ആക്ഷന്പ്ലാന് ഉടന് തയ്യാറാക്കും. തൊഴിലുറപ്പ് തൊഴിലാളികള്ക്ക് ചെയ്യാന് കഴിയാത്ത പ്രവര്ത്തികള് പെരിയാര്വാലിതന്നെ പൂര്ത്തിയാക്കും. ബ്ലോക്ക് പഞ്ചായത്ത് വിളിച്ച യോഗത്തിലാണ് തീരുമാനങ്ങള്.
പ്രസിഡന്റ് ജെസി സാജു ഉദ്ഘാടനം ചെയ്തു. വൈസ് പ്രസിഡന്റ് ബിജോയി ജോസഫിന്റെ അധ്യക്ഷത വഹിച്ചു. ജനപ്രതിനിധികളും പെരിയാര്വാലി ഉദ്യോഗസ്ഥരും പങ്കെടുത്തു. ഇപ്പോഴത്തെ വേനല്ക്കാലത്തിന്റെ തുടക്കത്തില് കനാലുകളില് മാലിന്യങ്ങള് നിറഞ്ഞ് ജലമൊഴുക്ക് തടസപ്പെട്ടിരുന്നു. പല പ്രദേശങ്ങളിലും വെള്ളം എത്തിയതുമില്ല. ജലക്ഷാമം പ്രതിഷേധത്തിന് കാരണമായി. ഈ സാഹചര്യത്തിലാണ് മുന്കൂട്ടിയുള്ള തയ്യാറെടുപ്പ്.
തൊഴിലുറപ്പ് പദ്ധതിയില് ഒരേ പ്രവര്ത്തി വീണ്ടും ഏറ്റെടുക്കാന് മൂന്ന് വര്ഷത്തെ ഇടവേള ആവശ്യമാണ്. അതിനാലാണ് കഴിഞ്ഞവര്ഷം കീരമ്പാറ, കോട്ടപ്പടി , നെല്ലിക്കുഴി പഞ്ചായത്തുകളില് കനാല് ശുചീകരണം ഏറ്റെടുക്കാന് കഴിയാതിരുന്നത്. പിണ്ടിമനയില് കുറച്ച് പ്രവര്ത്തി നടപ്പാക്കിയിരുന്നു.
