കോതമംഗലം: വനത്തില് ബീറ്റിന് (പെട്രോളിങ്ങിന് ) പോയ 2 വനിതാ ബിഎഫ്ഒ അടക്കം എട്ടംഗ വനപാലക സംഘം ഒരു രാത്രി വനത്തില് കുടുങ്ങി. നേര്യമംഗലം ഫോറസ്റ്റ് റേയ്ഞ്ച് പരിധിയിലെ നീണ്ടപാറക്ക് സമീപം നഗരംപാറ ഫോറസ്റ്റ് സ്റ്റേഷനിലെ വനപാലകരാണ് വനത്തില് അകപ്പെട്ടത്. ലോവര് പെരിയാര് വൈദ്യുത പദ്ധതിയുമായി ബന്ധപ്പെട്ട ഓഡിറ്റ് 4 എന്ന സ്ഥലത്ത്നിന്നും ചൊവ്വാഴ്ച രാവിലെ 8-നാണ് മണ്ണിയം ഭാഗത്തേക്ക് ബീറ്റിന് പോയത്.
എസ്എഫ്ഒ. (ഗ്രേഡ്) പി.എ. അഷ്റഫ്, ബിഎഫ്ഒമാരായ ജെറി ജോസഫ്, പോള് ഐസക്, കെ.ബി. ശ്രീലക്ഷ്മി എന്നിവരാണ് വനത്തില് കുടുങ്ങിയത്. ഇവരെ തിരിച്ച് കൊണ്ടു വരാനായി രാത്രി പോയ ബിഎഫ്ഒമാരായ സാബു കുര്യന്, രാജേഷ്കുമാര്, ബിനുലാല്, മഹിമ എന്നിവരും വനത്തില് അകപ്പെട്ടു. ബുധനാഴ്ച രാവിലെ 8.30 ഓടെ 15 പേരടങ്ങുന്ന മറ്റൊരു സംഘം എത്തിയാണ് ഇവരെ സുരക്ഷിതമായി തിരിച്ചെത്തിച്ചത്.
ചൊവ്വാഴ്ച രാവിലെ പോയ എട്ടംഗ സംഘത്തില് പിന്നില് പോയ നാല് പേര് വൈകിട്ടോടെ തിരിച്ചെത്തിയിരുന്നു. മുന്നില് പോയ വനിത ഉള്പ്പെടെ രണ്ട് പേര്ക്ക് കാലിലെ പരിക്ക് കാരണം വേഗത്തില് നടക്കാനായില്ല. വൈകിട്ട് കനത്തമഴ പെയ്തതോടെ കുത്തനെ ഇറക്കം ഇറങ്ങാനാവാതെ പ്രതിസന്ധിയിലായി.
കാറ്റും മഴയും ഇരുട്ടും വ്യാപിച്ചതോടെ മറ്റ് വഴികള് തേടിയെങ്കിലും 15 കിലോമീറ്ററുകളോളം സഞ്ചരിച്ച ഇവര്ക്ക് തിരിച്ചെത്താനായില്ലെന്ന്് സംഘത്തിലുള്ളവര് പറയുന്നു. നാല് പേരും സ്റ്റേഷനിലെ മറ്റ് സ്റ്റാഫുകളുമായി മൊബൈലില് ബന്ധപ്പെട്ടുകൊണ്ടാണിരുന്നത്. സുരക്ഷിതമായി പാറപ്പുറത്ത് ഇരിക്കുകയായിരുന്ന ഇവര്ക്ക് രാത്രി 7 ഓടെ ഭക്ഷണവും വെള്ളവുമായെത്തിയ നാലംഗ സംഘത്തിനും പ്രതികൂല കാലാവസ്ഥ കാരണം തിരിച്ചിറങ്ങാന് സാധിച്ചില്ല.
എട്ട് പേര് വനത്തില് കുടുങ്ങിയതോടെ ഇവരെ പുറത്തെത്തിക്കാന് നേര്യമംഗലം റേയ്ഞ്ച് അധികൃതരുടെ നേതൃത്വത്തില് മൂന്നാര് ആര്ആര്ടി, ഇഞ്ചത്തൊട്ടി, വാളറ, അടിമാലി എന്നീ ഫോറസ്റ്റ് സ്റ്റേഷനുകളിലെ വനപാലകര് കൂടി എത്തി ബുധനാഴ്ച പുലര്ച്ചെ നാലോടെ പുറപ്പെട്ടു. രാവിലെ 6.15 ഓടെ സംഘം ഇവര്ക്ക് സമീപം എത്തി. 8.30 ഓടെ നഗരംപാറ സ്റ്റേഷനില് തിരിച്ച് എത്തിക്കുകയായിരുന്നു.
നേര്യമംഗലം റേയ്ഞ്ച് പരിധിയില് നഗരംപാറ സ്റ്റേഷന് പരിധിയില് കേവലം 20 ചതുരശ്ര കിലോമീറ്റര് വനവിസ്തൃതിയുള്ള സ്ഥലത്ത് വനപാലകര് കുടുങ്ങിയെന്ന് പറയുന്നതില് ബീറ്റ് പോകുന്നതുമായി ബന്ധപ്പെട്ട് മേലുദ്യോഗസ്ഥരുമായുള്ള അസ്വാരസ്യമാണെന്ന് ആക്ഷേപവുമുയര്ന്നിട്ടുണ്ട്. വനത്തെ കുറിച്ച് കൃത്യമായി അറിയാവുന്ന വനപാലര്ക്ക്് ഇത്രയും ചെറിയൊരു വനമേഖലയില് വഴിതെറ്റിയെന്ന് പറയുന്നത് വിശ്വസനീയമല്ലെന്നാണ് നാട്ടുകാരും പറയുന്നത്.
