മൂവാറ്റുപുഴ: ആവോലി പഞ്ചായത്തിലെ വള്ളിക്കട കടവില് നിന്നും ഞായറാഴ്ച വൈകിട്ട് ഒഴുക്കില്പെട്ട് കാണാതായ വിദ്യാര്ത്ഥികളില് രണ്ടാമത്തെയാളുടെയും മൃതദേഹം കണ്ടെത്തി. പരീക്കപീടിക അടയ്ക്കാമുണ്ടക്കല് ബിനുവിന്റെ മകന് ക്രിസിന്റെ (17) മൃതദേഹമാണ് തിങ്കളാഴ്ച രാവിലെ 10.30 ഓടെ മൂവാറ്റുപുഴ പുഴക്കരക്കാവിന് സമീപത്ത് നിന്നും കണ്ടെത്തിയത്.
ഞായറാഴ്ച വൈകിട്ട് 6 ഓടെ ആറംഗ സംഘം വെള്ളിക്കട കടവില് കുളിക്കുന്നതിനായി ഇറങ്ങിയപ്പോഴാണ് അപകടമുണ്ടായത്. അടിയൊഴുക്കുള്ള സ്ഥലത്ത് മൂന്ന് വിദ്യാര്ത്ഥികള് ഒഴുക്കല്പ്പെടുകയായിരുന്നു. ഇവരില് ഒരാള് സ്വയമേ നീന്തി രക്ഷപ്പെട്ട് കരയ്ക്കെത്തിയിരുന്നു. എന്നാല് ക്രിസിനെയും, വാഴക്കുളം വെട്ടിക്കാട്ടുകുടി സന്തോഷിന്റെ മകന് അശ്വിന് (17) നെയും ഒഴുക്കില്പ്പെട്ട് കാണാതാവുകയായിരുന്നു.
ഉടന്തന്നെ മൂവാറ്റുപുഴ ഫയര്ഫോഴ്സും, സ്കൂബ ടീമും, കോതമംഗലം ഫയര്ഫോഴ്സിലെ സ്കൂബ ടീമും, നാട്ടുകാരും ചേര്ന്ന് സ്ഥലത്തെത്തി തിരച്ചില് ആരംഭിച്ചെങ്കിലും ഞായറാഴ്ച രാത്രി വൈകിയും ഇരുവരെയും കണ്ടെത്താനായിരുന്നില്ല. തുടര്ന്ന് തിങ്കളാഴ്ച പുലര്ച്ചെ ആറോടെ മൂവാറ്റുപുഴയിലെ സേനാംഗങ്ങളും, സ്കൂബ ടീമും, തൊടുപുഴയില് നിന്നുള്ള സ്കൂബ ടീമും ചേര്ന്ന് നടത്തിയ തിരച്ചില് സമീപത്തെ കടവില് നിന്നും അശ്വിന്റെ മൃതദേഹം കണ്ടെത്തിയിരുന്നു. തുടര്ന്നാണ് മൂവാറ്റുപുഴ പുഴക്കരക്കാവിന് സമീപത്ത് നിന്നും ക്രിസിന്റെ മൃതദേഹം കണ്ടെത്തിയത്.
