ഇടുക്കി: നാരകകാനത്ത് ജീപ്പ് മറിഞ്ഞ് രണ്ടുപേര് മരിച്ചു. കൂത്താട്ടുകുളം സ്വദേശിനിയായ മണ്ണത്തൂര് കാക്കാനിക്കല് സാറാമ്മ (65) ചെമ്മഞ്ചിയില് നിക്കു (ആറ് മാസം) എന്നിവരാണ് മരിച്ചത്. മൂന്നുപേര്ക്ക് പരിക്കേറ്റു. ഇവരുടെനില അതീവ ഗുരുതരമാണ്. നാരകക്കാനം സെന്റ് തോമസ് മൗണ്ടില് വിനോദയാത്രയ്ക്ക് എത്തിയ സംഘത്തിന്റെ ജീപ്പാണ് അപകടത്തില്പ്പെട്ടത്.
വൈകുന്നേരം ആറരയോടെയാണ് അപകടം ഉണ്ടായത്. 50 അടി താഴ്ചയിലേക്ക് വാഹനം മറിയുകയായിരുന്നു. ഡബിള് കട്ടിംഗില് വിവാഹത്തില് പങ്കെടുക്കുന്നതിന് വേണ്ടി എത്തിയ ആളുകള് വിവാഹശേഷം സമീപത്തെ വിനോദസഞ്ചാര കേന്ദ്രമായ സെന്റ് തോമസ് മൗണ്ട് സന്ദര്ശിച്ചിട്ട് തിരികെ ഇറങ്ങിവരുന്ന വഴിക്ക് നിയന്ത്രണംവിട്ടാണ് ജീപ്പ് മറിഞ്ഞത്.
കൊച്ചുകുട്ടികള് ഉള്പ്പെടെ പന്ത്രണ്ടോളം പേരായിരുന്നു ജീപ്പില് ഉണ്ടായിരുന്നത്. പ്രദേശവാസികളുടെ നേതൃത്വത്തില് സ്വകാര്യ വാഹനങ്ങളിലും മറ്റും പരിക്കേറ്റവരെ ഇടുക്കി മെഡിക്കല് കോളജില് എത്തിക്കുകയായിരുന്നു. അതീവ ഗുരുതരാവസ്ഥയിലായ മൂന്നു പേരെ കോട്ടയം മെഡിക്കല് കോളജിലേക്ക് മാറ്റി.
ഡബിള് കട്ടിംഗ്, കൂത്താട്ടുകുളം സ്വദേശികളായ ജോളി, സാലു, എല്ദോസ്, ജൂലിയറ്റ്, സാജന്, ജ്യോതിഷ്, ജോമല്, നിഹാര, ചിന്നു, എല്ദോസ് എന്നിവര്ക്കാണ് പരിക്കേറ്റത്. ഡ്രൈവറുടെ പരിചയക്കുറവാണ് അപകടത്തിന് കാരണമെന്നാണ് പ്രാഥമിക നിഗമനം.
