കോതമംഗലം: കോതമംഗലത്തിന് സമീപം ആയക്കാട് IPC ബഥേൽ ചർച്ച് ഹാളിൻ്റെ മുറ്റത്ത് മതിൽക്കെട്ടിലൊളിച്ച മൂന്ന് മൂർഖൻ പാമ്പുകളെ പിടികൂടി. ഉച്ചയോടെ ചർച്ച് ഹാളിനു സമീപം ഒരു മൂർഖൻ പാമ്പിനെ പാസ്റ്റർ എൽദോ വർഗീസ് കണ്ടതിനെ തുടർന്ന് വാർഡ് മെമ്പർ ബിൻസിയെ വിവരമറിയിക്കുകയായിരുന്നു. തുടർന്ന് പാമ്പുപിടുത്ത വിദഗ്ദ്ധരായ മാർട്ടിൻ മേയ്ക്ക മാലിയും, ജുവൽ ജൂഡിയും സ്ഥലത്തെത്തി മതിൽക്കെട്ട് പരിശോധിച്ചപ്പോഴാണ് മൂന്ന് മൂർഖൻ പാമ്പുകൾ ഉണ്ടെന്ന വിവരം അറിഞ്ഞത്.
തുടർന്ന് ഇരുവരും ചേർന്ന് മൂന്ന് പാമ്പുകളെയും പിടികൂടുകയായിരുന്നു. പിടികൂടിയ പാമ്പുകളെ വനപാലകർക്ക് കൈമാറും. ആദ്യമായാണ് മൂന്ന് പാമ്പുകളെ ഒരു മാളത്തിൽ നിന്ന് പിടികൂടുന്നതെന്ന് മാർട്ടിൻ പറഞ്ഞു.
