കോതമംഗലം: സംസ്ഥാന ന്യൂനപക്ഷ ക്ഷേമ വകുപ്പിന്റെ ആഭിമുഖ്യത്തിൽ ജില്ലാ ഭരണകൂടവും,ന്യൂനപക്ഷ യുവജന പരിശീലന കേന്ദ്രങ്ങളും സംയുക്തമായി നടത്തുന്ന സൗജന്യ ഏകദിന കരിയർ ഗൈഡൻസ് ക്യാമ്പ് ‘പാസ്സ്വേർഡ് 2024-25’ കോതമംഗലം സെൻറ് ജോർജ് ഹയർ സെക്കൻഡറി സ്കൂളിൽ വച്ച് നടന്നു. ആൻറണി ജോൺ എംഎൽഎ ക്യാമ്പ് ഉദ്ഘാടനം ചെയ്തു. ലാൻഡ് റവന്യൂ തഹസിൽദാർ മായ എം അധ്യക്ഷത വഹിച്ചു. മട്ടാഞ്ചേരി സി സി വൈ എം സ്കൂൾ പ്രിൻസിപ്പൽ ഡോ ഹസീന വി എൻ പദ്ധതിയെക്കുറിച്ച് വിശദീകരിച്ചു.
സെൻറ് ജോർജ് സ്കൂൾ മാനേജർ റവ ഡോക്ടർ തോമസ് ചെറുപറമ്പിൽ മുഖ്യ സന്ദേശം നൽകി. വാർഡ് കൗൺസിലർ റിൻസ് റോയി, പി ടി എ പ്രസിഡന്റ് സജി എ പോൾ ,അഡ്വ കുഞ്ഞുമോൻ ടി കെ എന്നിവർ ആശംസകൾ അറിയിച്ചു. പ്രിൻസിപ്പൽ ബിജു ജോസഫ് സ്വാഗതവും കരിയർ ഗൈഡൻസ് കോഡിനേറ്റർ രാജേന്ദ്രൻ പോറ്റി നന്ദിയും പറഞ്ഞു.
