കോതമംഗലം: കോതമംഗലം നിയോജക മണ്ഡലം എൻ ഡി എ സ്ഥാനാർത്ഥി ഷൈൻ കെ കൃഷ്ണന്റെ തൃക്കാരിയൂർ മേഖലയിലെ തെരഞ്ഞെടുപ്പ് പര്യടനം തൃക്കാരിയൂർ മഹാദേവ ക്ഷേത്ര ദർശനത്തോടെ ആരംഭിച്ചു. ക്ഷേത്ര പ്രദക്ഷിണം നടത്തിയപ്പോൾ ക്ഷേത്രോൽസവത്തിന് തൃക്കാരിയൂരപ്പന്റെ തിടമ്പേറ്റാനെത്തിയ ഗജവീരൻ കുന്നുമ്മേൽ പരശുരാമന്റെ അടുത്തെത്തി പഴവും മധുര പലഹാരവും നൽകി. തൃക്കാരിയൂരിലെത്തിയ സ്ഥാനാർത്ഥിയെ ബിജെപി -എൻ ഡി എ പ്രവർത്തകർ ഷാളുകൾ അണിയിച്ചും പൂച്ചെണ്ടുകൾ നൽകിയും സ്വീകരിച്ചു.
ക്ഷേത്രത്തിൽ മൂന്നാം ഉത്സവ ദിനത്തിൽ തൊഴാനെത്തിയ നിരവധിപേരെ സ്ഥാനാർത്ഥി നേരിൽ കാണുകയുണ്ടായി.
തുടർന്ന് തൃക്കാരിയൂർ- അയക്കാട് ജംഗ്ഷനുകളിലെ കച്ചവട സ്ഥാപങ്ങളിലും ഓട്ടോ സ്റ്റാന്റുകളിലും വിവിധ ഓഫീസുകളിലും വോട്ട് അഭ്യർത്ഥനയുമായെത്തി. മേഖലയിലെ വിവിധ സാമൂഹ്യ-സാംസ്കാരിക – സാമുദായിക സംഘടനാ നേതാക്കളെ വീടുകളിലെത്തി സന്ദർശിച്ചു. തൃക്കാരിയൂരിലെ വാർഡ് മെമ്പർമാരായ സനൽ പുത്തൻപുരക്കൽ, ശോഭ രാധാകൃഷ്ണൻ, സിന്ധു പ്രവീൺ, ബിജെപി മേഖല പ്രസിഡന്റ് കെ എൻ ജയചന്ദ്രൻ, BDJS കൺവീനർ ചന്ദ്രബോസ് മുട്ടത്തുകുടി, തുടങ്ങി NDA നേതാക്കൾ ഒപ്പമുണ്ടായിരുന്നു.
