കോതമംഗലം ; ചെറുവട്ടൂര്‍ കക്ഷായിപ്പടി – ഊരംകുഴി റോഡ് നിര്‍മ്മാണവുമായി ബന്ധപെട്ട് അനധികൃതമായി മതില്‍ പൊളിച്ചതിന് കരാറുകാര്‍ക്കും മറ്റ് രണ്ട് പേര്‍ക്കുമെതിരെ പോലീസ് കേസെടുത്തു. നിര്‍മ്മാണത്തിലിരിക്കുന്ന റോഡിന് വീതികൂട്ടാന്‍ ഇരുവശങ്ങളിലേയും കുടി ഉടമകള്‍ക്ക് നോട്ടീസ് നല്‍കുകയൊ, റോഡിന് ആവശ്യമായ ഭൂമി വിട്ടുനല്‍കാന്‍ ആവശ്യപെടുകയൊ മതിലുകളും മറ്റ് അതിര്‍ത്തികളും പൊളിച്ച് മാറ്റി നല്‍കാന്‍ ആവശ്യപെടുകയൊ ചെയ്യാതെ അനധികൃതമായി ജെസിബി ഉപയോഗിച്ച് ഇവ പൊളിച്ച് മാറ്റി ഇവരുടെ പുതിയ മതിലുകളും അതിരുകളും നശിപ്പിച്ച് നഷ്ടം വരുത്തിയതിനാണ് കേസെടുത്തിട്ടുളളത്. തദ്ദേശതെരഞ്ഞെടുപ്പിന് മുന്നെയാണ് അനധികൃതമായി ഈ മതിലുകള്‍ ബലമായി പൊളിച്ചത് ഇതിനെ തുടര്‍ന്ന് ഈ വിഷയം പറഞ്ഞ് തീര്‍ക്കാന്‍ കോണ്‍ഗ്രസ് മണ്ഡലം പ്രസിഡന്‍റെ നേതൃത്വംത്തില്‍ മധ്യസ്ഥ ശ്രമം നടന്നിരുന്നു.
റോഡിന് ആവശ്യമായ ഭൂമി എടുത്ത് അനധികൃതമായി പൊളിച്ച മതില്‍ കരാറുകാരന്‍ നിര്‍മ്മിച്ച് നല്‍കാം എന്ന വ്യവസ്ഥയില്‍ പ്രശ്നം ഒത്തുതീര്‍പ്പ് ആക്കിയെങ്കിലും ഇവരുടെ മതിലുകള്‍ നിര്‍മ്മിച്ച് നല്‍കാതെ കരാറുകാര്‍ കഴിഞ്ഞ ദിവസം റോഡിന്‍റെ ടാറിങ് ജോലികള്‍ക്കായ് എത്തുകയും ഇതില്‍ ഒരാള്‍ മതില്‍ നിര്‍മ്മിച്ച് നല്‍കാന്‍ ആവശ്യപെട്ടതോടെ കയ്യേറ്റം ചെയ്യാന്‍ ശ്രമിച്ചതായാണ് പരാതി. ഇതോടെ ബ്ലോക്ക് പഞ്ചായത്ത് പ്രസിഡന്‍റ് പി.എ.എം ബഷീറും പ്രദേശവാസികളും ചേര്‍ന്ന് റോഡ് നിര്‍മ്മാണം തടസപെടുത്തുകയും സ്ഥലത്ത് സംഘര്‍ഷാവസ്ഥ ഉണ്ടാവുകയും ചെയ്തു.
കോതമംഗലം സി.ഐ യുടെ നേതൃത്വത്തില്‍ സ്ഥലത്തെത്തിയാണ് സംഘര്‍ഷം അവസാനിപ്പിച്ചത്. ഇതോടെ പ്രദേശവാസികള്‍ അനധികൃതമായി മതില്‍ പൊളിച്ചതിന് പോലീസില്‍ പരാതിനല്‍കിയത്. കരാറുകാരായ അഷറഫ്,ബക്കര്‍,ഇസ്മയില്‍ ,ജെസിബി ഡ്രൈവര്‍,ഇവര്‍ക്ക് സഹായം നല്‍കിയ സിദ്ധീക്ക് തട്ടുപറബില്‍ എന്നിവര്‍ക്കതിരെ ക്രം നബര്‍ 395/2021 പ്രകാരമാണ് കോതമംഗലം പോലീസ് കേസെടുത്തിട്ടുളളത്.
