പെരുമ്പാവൂർ : എം.എൽ.എ ഫണ്ടിൽ നിന്നും അനുവദിച്ചു കെട്ടിട നിർമ്മാണം പൂർത്തീകരിച്ച എട്ട് വിദ്യാലയങ്ങൾക്കും പൊതു വിദ്യാഭ്യാസ സംരക്ഷണ യജ്‌ഞ പ്രകാരം നിർമ്മാണം പൂർത്തീകരിച്ച ഒരു വിദ്യാലയത്തിനും ഉൾപ്പെടെ ഒൻപത് സർക്കാർ വിദ്യാലയങ്ങൾക്ക് ആധുനിക ഫർണിച്ചറുകൾ നൽകുമെന്ന് അഡ്വ. എൽദോസ് കുന്നപ്പിള്ളി എം.എൽ.എ അറിയിച്ചു. എം.എൽ.എ ഫണ്ടിൽ നിന്ന് 42.30 ലക്ഷം രൂപ ചെലവഴിച്ചാണ് പദ്ധതി നടപ്പിലാക്കുന്നത്. മണ്ഡലത്തിലെ വിദ്യാഭ്യാസ മേഖലയിൽ നടപ്പിലാക്കുന്ന ഇൻസ്പെയർ പെരുമ്പാവൂർ വിദ്യാഭ്യാസ പദ്ധതി പ്രകാരം എം.എൽ.എയുടെ ഈ വർഷത്തെ പ്രാദേശിക വികസന ഫണ്ടിൽ നിന്നും അനുവദിച്ച തുകയ്ക്കുള്ള ഭരണാനുമതി ലഭ്യമായി.
37 ക്ലാസ് മുറികളിൽ ഈ പദ്ധതി നടപ്പിലാക്കുന്നതോടെ 9 സർക്കാർ വിദ്യാലയങ്ങൾ പൂർണ്ണമായും ആധുനിക നിലവാരത്തിലേക്ക് ഉയർത്തപ്പെടുമെന്ന് എം.എൽ.എ പറഞ്ഞു. കുട്ടികൾക്കുള്ള 451 ഫർണ്ണിച്ചറുകളും അധ്യാപകർക്കുള്ള 37 ഫർണ്ണിച്ചറുകളും ഉൾപ്പെടെയുള്ള 488 മോഡേൺ ഫർണിച്ചറുകൾ വിദ്യാലയങ്ങൾക്ക് പുതിയ മുഖം നൽകും. രണ്ട് വിദ്യാർത്ഥികൾക്ക് ഒരു ഫർണിച്ചർ എന്ന രീതിയിൽ വിദ്യാർത്ഥികളുടെ എണ്ണത്തിന് ആനുപാതികമായ ഫർണ്ണിച്ചറുകളാണ് അനുവദിച്ചിട്ടുള്ളത്.
കൊമ്പനാട് ഗവ. യു.പി സ്‌കൂൾ 71 എണ്ണം, വേങ്ങൂർ ഗവ. എൽ.പി സ്‌കൂൾ 58 എണ്ണം, ഗവ. എൽ.പി സ്‌കൂൾ പുല്ലുവഴി 62 എണ്ണം, വാണിയപ്പിള്ളി ഗവ. എൽ.പി സ്‌കൂൾ 28 എണ്ണം, കാഞ്ഞിരക്കാട് ഗവ. എൽ.പി സ്‌കൂൾ 8 എണ്ണം, വളയൻചിറങ്ങറ ഗവ. എൽ.പി സ്‌കൂൾ 80 എണ്ണം, കീഴില്ലം ഗവ. യു.പി സ്‌കൂൾ 26 എണ്ണം, ഗവ. യു.പി സ്‌കൂൾ പുഴുക്കാട് – 25 എണ്ണം, ഇരിങ്ങോൾ ഗവ. വൊക്കേഷണൽ ഹയർസെക്കൻഡറി സ്‌കൂൾ 130 എണ്ണം എന്നീ വിദ്യാലയങ്ങളിലാണ് പദ്ധതി പ്രകാരം ഫർണ്ണിച്ചറുകൾ അനുവദിച്ചത്.
