കോതമംഗലം : പല്ലാരിമംഗലം അടിവാട് തേങ്ങയിടാൻ മെഷിൻ ഉപയോഗിച്ച് തെങ്ങിൽ കയറി കുടുങ്ങിയ സുധാകരൻ എന്ന തൊഴിയാളിയെ കോതമംഗലം അഗ്നിരക്ഷാ സേന രക്ഷിച്ചു. തെങ്ങിൽ കയറി തേങ്ങയിട്ട് താഴോട്ട് ഇറങ്ങുന്നതിനിടയിൽ സുധാകരന്റെ കാൽ മെഷീനിൽ കുടുങ്ങുകയും ഇറങ്ങാൻ കഴിയാതെ വരികയും ആയിരുന്നു. ഇത് കണ്ട് സമീപവാസിയായ അഷ്റഫ് തെങ്ങിൽ കയറി സുധാകരനെ കെട്ടി നിർത്തുകയായിരുന്നു.
കോതമംഗലത്ത് നിന്നും ഗ്രേഡ് അസ്സി. സ്റ്റേഷൻ ഓഫീസർ കെ.എം.മുഹമ്മദ് ഷാഫിയുടെ നേതൃത്വത്തിൽ എത്തിയ അഗ്നി രക്ഷാ സേന അംഗം ഒ.എ ആബിദ് തെങ്ങിൽ കയറി ചെയർ നോട്ടിന്റെ സഹായത്താൽ ആളെ സുരക്ഷിതമായി താഴെ ഇറക്കി. സേനാംഗങ്ങളായ ആർഎച്ച്. വൈശാഖ്, കെ.എം അഖിൽ , കെ.റ്റി രാമചന്ദ്രൻ നായർ , കെ.യു.സുധീഷ് , ബിനുകുമാർ എന്നിവരും രക്ഷാപ്രവർത്തനത്തിൽ പങ്കെടുത്തു.
