ഇടുക്കി : ഡീന്‍ കുര്യാക്കോസ് എംപി സഞ്ചരിച്ച വാഹനത്തില്‍ മദ്യലഹരിയിലെത്തിയ മറ്റൊരു കാര്‍ ഇടിച്ചു. നിര്‍ത്താതെ പോയ കാര്‍ പോലീസ് പരിശോധനക്കായി കൈ കാണിച്ചിട്ടും നിര്‍ത്താതിരുന്നതിനെത്തുടര്‍ന്ന് ഏലപ്പാറയില്‍ ഗതാഗത ക്രമീകരണം ഏര്‍പ്പെടുത്തി പോലീസ് വാഹനം പിടി കൂടി. പാമ്പാടുംപാറ സ്വദേശി സുധീഷിനെയാണ് പോലീസ് പിടികൂടിയത്. പോലീസ് സംഘത്തിനുനേരേ തട്ടിക്കയറിയ ഡ്രൈവറെ വൈദ്യ പരിശോധനയ്ക്കു വിധേയനാക്കിയപ്പോഴാണ് ഇയാള്‍ മദ്യപിച്ചിരുന്നതായി കണ്ടെത്തിയത്. തുടര്‍ന്ന് മദ്യപിച്ചു വാഹനം ഓടിച്ചതിനും പോലീസ്
പരിശോധനക്കായി കൈ കാണിച്ചിട്ടും വാഹനം നിറുത്താതെ പോയതിനും ഇയാള്‍ക്കെതിരേ രണ്ടു കേസുകള്‍ ചാര്‍ജ് ചെയ്തു.
ഞായറാഴ്ച രാത്രി ഏഴോടെ പെരുവന്താനത്തിന് സമീപമാണ് എംപിയുടെ വാഹനത്തില്‍ പിന്നോട്ടു വന്ന കാര്‍ ഇടിച്ചു കേടുപാടുകള്‍ വരുത്തിയത്. നിര്‍ത്താതെപോയ വാഹനം വളഞാങ്ങാനം വെള്ളച്ചാട്ടത്തിനു സമീപം കിടക്കുന്നതു പിന്നാലെ വന്ന എംപിയുടെ ശ്രദ്ധയില്‍പ്പെട്ടു. എംപിയുടെ കാര്‍ ഇവിടെ നിര്‍ത്തി വാഹനത്തില്‍ ഇടിച്ചതിനെക്കുറിച്ചു ചോദിച്ചപ്പോള്‍ ഇയാള്‍ എംപിയെ പരിഹസിച്ച ശേഷം വീണ്ടും അമിത വേഗതയില്‍ പാഞ്ഞു പോകുകയായിരുന്നു. തുടര്‍ന്ന് പീരുമേട് സിഐ ഗോപി ചന്ദ്രന്‍ ഏലപ്പാറയില്‍ പെട്രോളിംഗ് നടത്തിയിരുന്ന പോലീസ് സംഘത്തോട് വാഹനം പിടികൂടാന്‍ നിര്‍ദേശിച്ചതനുസരിച്ചാണ് വാഹനം പിടികൂടിയത്.
