കോതമംഗലം: നാടുകാണി മലയില് രാത്രിയില് കുടുങ്ങിയ യുവാവിന് അഗ്നി രക്ഷാസേനയും പോലീസും നാട്ടുകാരും രക്ഷകരായി. കൊടുങ്ങല്ലൂര് സ്വദേശിയായ യുവാവ് ആണ് മലയില് കുടുങ്ങിയത്. സേനാംഗങ്ങളും നാട്ടുകാരും ചേര്ന്ന് മണിക്കൂറുകളോളം നടത്തിയ തിരച്ചിലിനൊടുവിലാണ് യുവാവിനെ കണ്ടെത്താനായത്.
കഴിഞ്ഞ രാത്രിയിലാണ് സംഭവം. സമുദ്രനിരപ്പില് നിന്നും 3000 അടി ഉയരം ഉള്ള നാടുകാണി മലയിലാണ് കൊടുങ്ങല്ലൂര് സ്വദേശിയായ യുവാവ് ഏറെ നേരം കുടുങ്ങി പോയത്. മലയടിവാരത്തുനിന്നും ഉദ്ദേശം ഒന്നര കിലോമീറ്ററോളം കുത്തനെ കയറ്റം ഉള്ള മല മുകളില് സൂര്യാസ്തമയം കാണാന് പോയതാണ്.
അസ്തമയം കണ്ട് താഴേക്ക് ഇറങ്ങിയപ്പോഴേക്കും ഇരുട്ട് വീണ് തുടങ്ങിയിരുന്നു. വഴിയറിയാതെ യുവാവ് മലമുകളില് ഏറെ നേരം അലഞ്ഞു. ഇരുട്ടു കൂടിയതോടെ ഭയാശങ്കയിലുമായി. വഴി തെറ്റി ക്ഷീണിതനായി മലയില് കുടുങ്ങിയ യുവാവ് രാത്രി 7.30 ഓടെ കോതമംഗലം പോലീസിനെ വിവരം അറിയിച്ചു.
പോലീസും അഗ്നി രക്ഷസേനയും എത്തി നാട്ടുകാരുടെ സഹായത്തോടെ മലമുകളില് പലയിടത്തായി കൂക്കിവിളിച്ചും ഫോണില് വിളിച്ചും ബന്ധപ്പെടുത്താനായി ഏറെ നേരം തിരഞ്ഞു. രണ്ടര മണിക്കൂര് നേരത്തെ പരിശ്രമത്തിനൊടുവില് ആറാം പോയിന്റില്നിന്ന് യുവാവിനെ കണ്ടെത്താനായതെന്ന് അഗ്നി രക്ഷാസേന അധികൃതര് പറഞ്ഞു.
ഏറെ ക്ഷീണിതനായ യുവാവിനെ രാത്രി വൈകി സുരക്ഷിതമായി താഴെ എത്തിച്ചു. ഫയര് സ്റ്റേഷനിലെ അസിസ്റ്റന്റ് സ്റ്റേഷന് ഓഫീസര് എം. അനില്കുമാര്, സീനിയര് ഫയര് ആന്ഡ് റെസ്ക്യൂ ഓഫീസര് സി.എം. നൗഷാദ്, ഫയര് ആന്ഡ് റെസ്ക്യൂ ഓഫീസര്മാരായ ഒ.എ. ആബിദ്, അജ്നാസ്, സുബ്രഹ്മണ്യന്, ഹോം കാര്ഡുമാരായ ബിനു, രാജീവന് എന്നിവരാണ് രക്ഷാപ്രവര്ത്തനത്തില് ഏര്പ്പെട്ടത്.
