കോതമംഗലം: പിറവത്ത് മൂവാറ്റുപുഴയാറില് നിര്ധന കുടുംബത്തിലെ ദമ്പതികളുടെയും മകന്റെയും മൃതദേഹങ്ങള് കണ്ടെത്തിയത് കോതമംഗലത്തിനും നൊമ്പരമായി. ചെറുവട്ടൂര് ഇരമല്ലൂരില് വാടകയ്ക്ക് താമസിക്കുന്ന പാലക്കാട് എലവഞ്ചേരി കുമ്പളക്കോട് നഗറില് നാരായണനും പൂര്ണമായും കാഴ്ചപരിമിതിയുള്ള ഭാര്യ പായിപ്ര മാനാറി പാലക്കാപ്പറമ്പില് പി.വി വിജിമോളും ഒരാഴ്ചമുമ്പ് കോതമംഗലം പോലീസ് സ്റ്റേഷനില് സഹായം തേടി എത്തിയിരുന്നു.
നിലവിലെ വാടകവീട് ഒഴിയാന് ഉടമ ആവശ്യപ്പെട്ടുവെന്നും തലചായ്ക്കാന് മറ്റൊരിടമില്ലെന്നും ഇന്സ്പെക്ടര് പ്രശാന്ത് കുമാറിനോട് സങ്കടം പറഞ്ഞു. രണ്ടുമക്കളുടെ കാര്യവും മറ്റൊരു വാടകവീട് എടുക്കാന് നിവൃത്തിയില്ലെന്നും പറഞ്ഞു. ഇരുവരും ലോട്ടറി വിറ്റ് കിട്ടുന്ന തുച്ഛമായ തുകയാണ് ഏക ഉപജീവനമാര്ഗമെന്നറിഞ്ഞ പോലീസ്, പട്ടണത്തിലെ ലോഡ്ജില് താല്ക്കാലിക താമസസൗകര്യം ഒരുക്കി.
നെല്ലിക്കുഴിയില് മറ്റൊരു വാടകവീടും ശരിയാക്കി. പോലീസ് ജീപ്പില് കുടുംബത്തെ കൊണ്ടുപോയി വീട് കാണിച്ചുകൊടുക്കുകയും ചെയ്തു. നിലവിലുള്ള വാടകവീട്ടില്നിന്ന് വീട്ടുപകരണങ്ങള് എത്തിച്ചശേഷം 29 മുതല് താമസം തുടങ്ങാമെന്ന് കുടുംബം പോലീസുദ്യോഗസ്ഥരോട് പറഞ്ഞിരുന്നു. പിന്നീട് വെള്ളിയാഴ്ച പോലീസ് ഇവര് താമസിക്കുന്ന ലോഡ്ജില് എത്തിയപ്പോള് കുടുംബസമേതം പിറവത്തേക്ക് പോയതായതായി ലോഡ്ജ് ജീവനക്കാര് പറഞ്ഞു.
കുടുംബം തിരികെ എത്താത്തതിനെ തുടര്ന്ന് പോലീസ് നടത്തിയ അന്വേഷണത്തില് പിറവത്തെ ഹോട്ടലില്നിന്നുള്ള സിസിടിവി ദൃശ്യങ്ങളിലാണ് ഇവരെ അവസാനമായി കണ്ടത്. പിന്നാലെ വിജിമോളുടെയും ആണ്കുഞ്ഞിന്റെയും മൃതദേഹങ്ങള് പുഴയില് കണ്ടെത്തിയ വിവരമറിഞ്ഞു. കുടുംബം ഒന്നാകെ പുഴയില് ചാടിയെന്ന വിവരമറിഞ്ഞതോടെ സഹായവുമായി ഒപ്പംനിന്ന പോലീസുദ്യോഗസ്ഥരും ഇവര് മുന്പ് താമസിച്ചിരുന്ന സ്ഥലങ്ങളിലെ അയല്വാസികളും പരിചയക്കാരുമെല്ലാം തീരാദുഃഖത്തിലാണ്.
