സേവനങ്ങളില്‍ മാറ്റമില്ലാതെ കുടുബാരോഗ്യകേന്ദ്രമായി ഉയര്‍ത്തിയ പിണ്ടിമന പ്രാഥമികാരോഗ്യകേന്ദ്രം

കോതമംഗലം: പിണ്ടിമന പ്രാഥമികാരോഗ്യകേന്ദ്രം കുടുബാരോഗ്യകേന്ദ്രമാക്കി ഉയർത്തിയതായി പ്രഖ്യാപിച്ചെങ്കിലും പ്രവർത്തനങ്ങളിലും സേവനങ്ങളിലും മാറ്റം ഉണ്ടായിട്ടില്ല. പിണ്ടിമന പഞ്ചായത്തിലെ മുത്തംകുഴിയില്‍ പ്രവര്‍ത്തിക്കുന്ന പ്രാഥമീകാരോഗ്യകേന്ദ്രം കഴിഞ്ഞ ഏപ്രില്‍ പതിനേഴിനാണ് കുടുബാരോഗ്യകേന്ദ്രമായി ഉയര്‍ത്തിയത്.മുഖ്യമന്ത്രി പിണറായി വിജയന്‍ ഓണ്‍ലൈന്‍വഴിയാണ് പ്രഖ്യാപവും ഉദ്ഘാടനവും നിര്‍വഹിച്ചത്.എന്നാല്‍ അന്നത്തെ ചടങ്ങ് അല്ലാതെ കുടുബാരോഗ്യമെന്ന നിലയിലുള്ള ഒരു പ്രവര്‍ത്തനവും ഇവിടെ നടപ്പായിട്ടില്ല.വൈകുന്നേരം ആറുവരെയുള്ള ഒ.പി.യാണ്,കുടുബാരോഗ്യകേന്ദ്രത്തിന്റെ പ്രധാന സേവനം.ഇതോടനുബന്ധിച്ചാണ് മറ്റ് സൗകര്യങ്ങളും ഒരുക്കുന്നത്.പഴയതുപോലെ ഉച്ചക്ക് ഒന്നുവരെ മാത്രമാണ് ഇവിടെ ഇപ്പോഴും ഒ.പി.സേവനമുള്ളത്.്.ഒ.പി.സേവനം വൈകുന്നേരംവരെ ലഭിക്കണമെങ്കില്‍ മൂന്ന് ഡോക്ടര്‍മാര്‍ ഉണ്ടാകണം.പിണ്ടിമനയില്‍ ഇപ്പോഴും രണ്ട് ഡോക്ടര്‍മാര്‍ മാത്രമാണുള്ളത്.നിയമനം ലഭിച്ച മൂന്നാമത്തെയാള്‍ അവധിയെടുത്ത് പോയി.രണ്ട് ഡോക്ടര്‍മാരുടെ സേവനംപോലും പലപ്പോഴും ഉണ്ടാകാറില്ല.ഔദ്യോഗീക കാര്യങ്ങളുമായി ബന്ധപ്പെട്ടോ അവധിയെടുക്കുന്നതിനാലോ ഒരു ഡോക്ടര്‍ ഇല്ലാതെവന്നാല്‍ ഒരു ഡോക്ടര്‍മാത്രമായി ചുരുങ്ങും.ആശുപത്രിയിലെത്തുന്ന പല രോഗികളും ചികിത്സ കിട്ടാതെ മടങ്ങേണ്ട സ്ഥിതിയുമുണ്ട്.വര്‍ഷങ്ങള്‍ക്ക് മുമ്പ് കിടത്തി ചികിത്സയണ്ടായിരുന്ന ആശുപത്രിയാണിത്.പിന്നീട് അധികാരികളുടെ അവഗണനമൂലം ഒ.പി.സേവനം മാത്രമായി ചുരുങ്ങി.കിടത്തിചികിത്സക്കാവശ്യമായ അടിസ്ഥാനസൗകര്യങ്ങള്‍ ഇപ്പോഴും ഇവിടെയുണ്ട്.