പെരുമ്പാവൂർ : മണ്ഡലത്തിലെ പ്രധാനപ്പെട്ട 7 ആരാധനാലയങ്ങളുടെ അടിസ്ഥാന സൗകര്യങ്ങൾ വർദ്ധിപ്പിക്കുന്നതിനായി പദ്ധതി തയ്യാറാക്കി സമർപ്പിച്ചതായി എൽദോസ് കുന്നപ്പിള്ളി എംഎൽഎ അറിയിച്ചു. കേന്ദ്ര സർക്കാരിന്റെ പ്രസാദ്, സ്വദേശി ദർശൻ പദ്ധതികളിലേക്ക് സമർപ്പിക്കുന്നതിനുള്ള വിശദമായ റിപ്പോർട്ട് സംസ്ഥാന ടൂറിസം ഡയറക്ടർ പി. ബാലകിരൺ ഐ.എ.എസ്സിന് കഴിഞ്ഞ ദിവസം നേരിൽ കണ്ട് എൽദോസ് കുന്നപ്പിള്ളി സമർപ്പിച്ചു. ടൂറിസം സെക്രട്ടറി ……….. യുമായും പദ്ധതി സംബന്ധിച്ചു എംഎൽഎ ചർച്ച നടത്തി. കേന്ദ്ര സർക്കാർ പദ്ധതികൾ ആയത് കൊണ്ട് സംസ്ഥാന ടൂറിസം വകുപ്പ് മുഖേനയാണ് പദ്ധതി സമർപ്പിക്കേണ്ടത്.
*പ്രസാദ്, സ്വദേശി ദർശൻ പദ്ധതികൾ*
പ്രധാനപ്പെട്ട ഹിന്ദു ക്ഷേത്രങ്ങള്, ക്രൈസ്തവ ദേവാലയങ്ങള്, മുസ്ലിം ആരാധനാലയങ്ങൾ എന്നിവയ്ക്കും ചുറ്റുമുള്ള പ്രദേശങ്ങളില് തീര്ഥാടകര്ക്കും വിനോദസഞ്ചാരികള്ക്കുമായി അടിസ്ഥാന സൗകര്യങ്ങള് ഒരുക്കുകയെന്നതാണ് പദ്ധതികളുടെ ലക്ഷ്യം. അദ്ധ്യാത്മക തീർത്ഥാടനത്തെ ശക്തിപ്പെടുത്തുക എന്ന ലക്ഷ്യത്തോടെയാണ് പദ്ധതിക്ക് തുടക്കം കുറിച്ചത്. തീർത്ഥാടകർക്കുള്ള പ്രാഥമിക സൗകര്യങ്ങളോരുക്കുക, ഭക്ഷണം, താമസം തുടങ്ങിയവക്കുള്ള സൗകര്യങ്ങൾ ഒരുക്കുക, കമ്യൂണിറ്റി ഹാൾ, വിവിധോദ്ദേശ്യഹാൾ, ശൗചാലയങ്ങൾ, പാർക്കിങ് സ്ഥലം, സൗന്ദര്യവൽക്കരണം തുടങ്ങിയ പ്രവർത്തനങ്ങൾക്കാണ് പണം അനുവദിക്കുന്നത്.
*ലക്ഷ്യം 25 കോടി രൂപയുടെ ആരാധനലയ വികസന പ്രവർത്തനങ്ങൾ*
മണ്ഡലത്തിലെ പ്രധാനപ്പെട്ട 7 ആരാധനാലയങ്ങളുടെ ഭൗതിക സാഹചര്യങ്ങൾ ലോക നിലവാരത്തിലേക്ക് ഉയർത്തുന്നതിനാണ് പദ്ധതി തയ്യാറാക്കിയത്. എറണാകുളം ജില്ലയിലെ ആദ്യത്തെ മുസ്ലിം പള്ളിയായി അറിയപ്പെടുന്ന 900 വർഷം പഴക്കമുള്ള സൗത്ത് വല്ലം ജുമാ മസ്ജിദ്, 28 ഏക്കർ വിസ്തീർണ്ണം ഉള്ള കാട്ടിൽ സ്ഥിതിചെയ്യുന്ന കല്ലിൽ ക്ഷേത്രം, ചുവർ ചിത്രങ്ങൾ കൊണ്ട് സമ്പന്നമായ വല്ലം സെന്റ് തെരാസസ് ഫൊറോനാ ചർച്ച്, 65 ഏക്കറിൽ വ്യാപിച്ചു കിടക്കുന്ന ഇരിങ്ങോൾ കാവ്, കുറുപ്പംപടി സെന്റ് മേരീസ് കത്തീഡ്രൽ, ചേലാമറ്റം ശ്രീകൃഷ്ണ സ്വാമി ക്ഷേത്രം, കീഴില്ലം ശ്രീ മഹാദേവ ക്ഷേത്രം എന്നീ ആരാധനലയങ്ങളെ പദ്ധതിയിൽ ഉൾപ്പെടുത്തണമെന്നാണ് എംഎൽഎ ആവശ്യപ്പെട്ടിരിക്കുന്നത്. അത്യാധുനികമായ സൗകര്യങ്ങൾ ഒരുക്കി കൂടുതൽ തീർത്ഥാടകർക്ക് അവസരമൊരുക്കും. ഇതിലൂടെ പ്രാദേശികമായ വികസനവും നടപ്പിലാക്കാനാകും.
