പെരുമ്പാവൂർ : എറണാകുളത്തിനൊപ്പം തന്നെ വളർന്നു കൊണ്ടിരിക്കുന്ന ചെറുപട്ടണമായ പെരുമ്പാവൂരിൽ കുട്ടികളുടെ മാനസിക ഉല്ലാസത്തിനും കളികൾക്കുമായി ഒരു പാർക്ക് എന്നത് അനിവാര്യതയാണ്. ഇന്നത്തെ കാലത്ത് ഫ്ലാറ്റ് സംസ്‌കാരത്തിൽ കുട്ടികൾ നാല് ചുവരുകൾക്കുള്ളിൽ ഒറ്റപെട്ടു പോകുന്നത് ഒഴിവാക്കാനും കുട്ടികൾക്കും കുടുംബങ്ങൾക്കും വൈകുന്നേരങ്ങൾ ചിലവഴിക്കാനും ആയി പെരുമ്പാവൂരിന്റെ ഹൃദയ ഭാഗത്ത്‌ എല്ലാ സൗകര്യങ്ങളോടും കൂടി ഒരു ചിൽഡ്രൻസ് പാർക്ക് യഥാർഥ്യമാവുകയാണ്. പെരുമ്പാവൂർ എം എൽ എ യുടെ 2020-2021 വർഷത്തെ ആസ്തി വികസന ഫണ്ടിൽ നിന്നുമാണ് പാർക്ക് നിർമ്മിക്കുന്നത്.
പെരുമ്പാവൂർ നഗരസഭ പരിധിയിൽ പട്ടാലിനു സമീപം പെരിയാർ വാലിയുടെ അധീനതയിലുള്ള അൻപത് സെന്റ് സ്ഥലത്താണ് ചിൽഡ്രൻസ് പാർക്ക് നിർമാണം പുരോഗമിക്കുന്നത്. മെയ് മാസം ആദ്യം പദ്ധതി പൂർത്തീകരിച്ചു പൊതുജനങ്ങൾക്ക് തുറന്ന് കൊടുക്കാനുള്ള ലക്ഷ്യമായിട്ടാണ് നിർമാണ പ്രവർത്തനങ്ങൾ മുന്നേറുന്നത്. തിരുവനന്തപുരം ആസ്ഥാനമാക്കി പ്രവർത്തിക്കുന്ന അഗ്രി ഹോർട്ടി സോസൈറ്റി ആണ് പാർക്കിന്റെ നിർമാണ പ്രവർത്തനങ്ങൾക്ക് നേതൃത്വം നൽകുന്നത്. നിർമാണം പൂർത്തീകരിച്ചു കഴിഞ്ഞു കഴിഞ്ഞാൽ കുട്ടികൾക്കും കുടുംബംങ്ങൾക്കും വിനോദ സഞ്ചാരികൾക്കും ചിൽഡ്രൻസ് പാർക്കൊരു ഉല്ലാസ കേന്ദ്രമായി മാറുമെന്ന് എൽദോസ് കുന്നപ്പിള്ളി എം എൽ എ അറിയിച്ചു.
