കോതമംഗലം: കുട്ടമ്പുഴ റേഞ്ചിലെ ആനക്കുളം ഫോറസ്റ്റ് സ്റ്റേഷന്‍ പരിധിയിലുള്ള മലയാറ്റൂര്‍ ഇടിയറ റിസര്‍വിന്റെ ഭാഗമായ വടക്കേ മണികണ്ഠന്‍ചാല്‍ റിസര്‍വ് വനത്തില്‍ നിന്നും ചെന്നായ്ക്കള്‍ ഇരയായി പിടിച്ച മ്ലാവിന്റെ ജഡം കൈവശപ്പെടുത്തി ഇറച്ചി ശേഖരിച്ച് വീട്ടില്‍ ഉണക്കി സൂക്ഷിച്ച കേസില്‍ പ്രതികള്‍ക്ക് പിഴയും തടവും.
ഒന്നാം പ്രതി കുട്ടമ്പുഴ മണികണ്ഠന്‍ചാല്‍ നിരപ്പേല്‍ രതീഷ്, രണ്ടാം പ്രതി ചാലക്കുടി പുത്തന്‍വീട്ടില്‍ സെബി എന്നിവരെയാണ് കോതമംഗലം ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് ഇ.എന്‍. ഹരിദാസന്‍ ശിക്ഷ വിധിച്ചത്. വന്യജീവി (സംരക്ഷണ) നിയമം 1972 സെക്ഷന്‍ 51 പ്രകാരം ആറു മാസം തടവും 5000 രൂപ വീതം പിഴയുമാണ് ശിക്ഷ.
2019 ജനുവരി 24 ന് കുട്ടമ്പുഴ ഫോറസ്റ്റ് റേഞ്ച് ഓഫീസര്‍ ആയിരുന്ന എസ്. രാജന് ലഭിച്ച വിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതികളില്‍ നിന്നും മ്ലാവ് ഇറച്ചി പിടികൂടുന്നതും റിസര്‍വ് വനത്തിനുള്ളില്‍ പ്രതികള്‍ മറവു ചെയ്തിരുന്ന മ്ലാവിന്റെ ജഡാവശിഷ്ടങ്ങള്‍ കണ്ടെടുക്കുന്നതും. ആനക്കുളം ഫോറസ്റ്റ് സ്റ്റേഷനിലാണ് കേസ് രജിസ്റ്റര്‍ ചെയ്തിരുന്നത്. പ്രോസിക്യൂഷനു വേണ്ടി അസിസ്റ്റന്റ് പബ്ലിക് പ്രോസിക്യൂട്ടര്‍ മഞ്ജു എ. കുര്യാക്കോസ് ഹാജരായി.
