കോതമംഗലം ; കോവിഡ് വ്യാപനവും ലോക്ക്ഡൗൺ മൂലവും പ്രതിസന്ധിലാകുന്ന ഭിന്നശേഷിക്കാർക്ക് കൈത്താങ്ങ് ആയി തണൽ പാലിയേറ്റീവ് ആന്റ് പാരാപ്ലീജിക് കെയറും,ഓൾ കേരള വീൽചെയർ റൈറ്റ്സ് ഫെഡറേഷനും മാതൃകയാകുകയാണ്. തണൽ,എ കെ ഡബ്യു ആർ എഫ് ന്റെ നേതൃത്വത്തിൽ വീൽ ചെയറിൽ സഞ്ചരിക്കുന്ന ഭിന്നശേഷിക്കാർക്ക് ഭക്ഷ്യധാന്യ കിറ്റ് വിതരണം ചെയ്തു. ആന്റണി ജോൺ എം എൽ എ ഭക്ഷ്യധാന്യ കിറ്റിൻ്റെ വിതരണോദ്ഘാടനം നിർവ്വഹിച്ചു. കോവിഡിന്റെ ഒന്നാം ഘട്ടത്തിലും ഭിന്നശേഷിക്കാർക്ക് കൈത്താങ്ങ് ആയി വിവിധ സന്നദ്ധ സംഘടനകളുടെയും ജനപ്രതിനിധികളുടെയും സഹായത്തോടെ അവർക്ക് വേണ്ട ഭക്ഷ്യകിറ്റ്,മാസ്ക്,സാനിറ്റൈസർ, മരുന്നുകൾ എന്നിവ ഈ സംഘടന നൽകിയിരുന്നു.കോവിഡിന്റെ രണ്ടാം ഘട്ടത്തിലും ക്വാറൻ്റയിനിലുളളവർക്ക് ഭക്ഷ്യധാന്യങ്ങൾ എത്തിച്ചിരുന്നു.
കോവിഡ് രണ്ടാം വ്യാപനത്തിന്റെ പശ്ചാത്തലത്തിലും കഴിഞ്ഞ ദിവസങ്ങളിലും ഭിന്നശേഷിക്കാർക്ക് ഭക്ഷ്യധാന്യ കിറ്റ് നൽകിയിരുന്നു. ചടങ്ങിൽ ഓൾ കേരള വീൽചെയർ റൈറ്റ്സ് ഫെഡറേഷൻ സംസ്ഥാന ജനറൽ സെക്രട്ടറി രാജീവ് പള്ളുരുത്തി,എ കെ ഡബ്യു ആർ എഫ് ജില്ലാ പ്രസിഡന്റ് പൈലി നെല്ലിമറ്റം,തണൽ അടിവാട് യൂണിറ്റ് രക്ഷാധികാരി ഇ എച്ച് അബ്ദുൾ കരീം,എ കെ ഡബ്യു ആർ എഫ് ജില്ലാ ഉപേദശക സമിതി അംഗങ്ങൾ ആയ മണിശർമ്മ, ദിപാമണി,തണൽ പാലിയേറ്റീവ് നെല്ലിക്കുഴി യൂണിറ്റ് ജനറൽ സെക്രട്ടറി പി എച്ച് റാഫി,റ്റി ഒ പരീത്,എൻ എം കെ സുധാകരൻ, എൻ എസ് ഷാജി,ബഷീർ പോഞ്ഞാശ്ശേരി എന്നിവർ പങ്കെടുത്തു.
