കുട്ടമ്പുഴ: മലയോര ജനതയ്ക്കും, ടൂറിസ്റ്റുകള്‍ക്കും ഏറെ പ്രയോജനകരമാകുന്ന മൂന്നാര്‍ രാജപാത വിഷയത്തില്‍ സര്‍ക്കാരിന്റെ അനാസ്ഥയിലും, അവഗണനയിലും കേരള കോണ്‍ഗ്രസ് (എം) കുട്ടമ്പുഴ മണ്ഡലം കമ്മിറ്റി പ്രതിഷേധിച്ചു. അധികാരമേറ്റ ഉടനെ ആഘോഷപൂര്‍വ്വം നാട്ടുകാരെയും, രാജപാത ആക്ഷന്‍ കൗണ്‍സില്‍ അംഗങ്ങളെയും ഉള്‍പ്പെടുത്തി മന്ത്രിയെ കുട്ടമ്പുഴയില്‍ എത്തിച്ച് റോഡ് സന്ദര്‍ശനം നടത്തുകയും, മത സാമുദായിക നേതാക്കളോടും, സമൂഹത്തോടും റിപ്പോര്‍ട്ടിന്റെ അടിസ്ഥാനത്തില്‍ മൂന്നുമാസത്തിനകം തുടര്‍നടപടികള്‍ സ്വീകരിച്ചു മുന്നോട്ടു പോകുമെന്ന് ഉറപ്പു കൊടുത്ത മന്ത്രിയും എംഎല്‍എയും ഇക്കാര്യത്തില്‍ ഒരു നടപടിയും സ്വീകരിച്ചില്ലെന്നും, ജനങ്ങളുടെ കണ്ണില്‍ പൊടിയിടാന്‍ നടത്തിയ നാടകം മാത്രമായിരുന്നു സന്ദര്‍ശനം എന്നും കേരള കോണ്‍ഗ്രസ് (എം) മണ്ഡലം കമ്മിറ്റി ആരോപിച്ചു.
രാജപാത വിഷയത്തില്‍ മന്ത്രിയും എംഎല്‍എയും പറഞ്ഞ വാക്കുകള്‍ നടപ്പാക്കിയില്ലെങ്കില്‍ സമരപരിപാടികള്‍ ആരംഭിക്കുവാന്‍ യോഗം തീരുമാനിച്ചു. ജില്ലാ പ്രസിഡന്റ് ടോമി കെ തോമസ് യോഗം ഉദ്ഘാടനം ചെയ്തു. പാര്‍ട്ടി മണ്ഡലം പ്രസിഡന്റ് ബിനോയ് പള്ളത്ത് അധ്യക്ഷത വഹിച്ചു. പാര്‍ട്ടി ഉന്നത അധികാര സമിതി അംഗം അഡ്വ വി വി ജോഷി മുഖ്യ പ്രഭാഷണം നടത്തി. പാര്‍ട്ടി സ്റ്റിയറിങ് കമ്മിറ്റി അംഗം അഡ്വ റോണി മാത്യു , അഡ്വ ജോസ് വര്‍ഗീസ്, സോണി ജോബ് അഡ്വ പോള്‍ മുണ്ടക്കല്‍, മാത്യു ചാഴിക്കാട്ട്, ഷാജി വെള്ളാവള്ളി, എം കെ എല്‍ദോസ് എന്നിവര്‍ പ്രസംഗിച്ചു.
