കോതമംഗലം: കോതമംഗലം റവന്യൂ ടവറിന് സമീപം വളർന്നുപന്തലിച്ചു നിൽക്കുന്ന തണൽമരങ്ങൾ അപകടക്കെണിയാകുന്നു. കാറ്റിൽ മരച്ചില്ലകളും മരങ്ങളും ഒടിഞ്ഞുവീഴുന്നതിനാൽ ടവർ അങ്കണത്തിലെത്തുന്നവർക്കും വാഹനങ്ങൾക്കും ഭീഷണിയായിരിക്കുകയാണ്ക.ഴിഞ്ഞ ദിവസം പാർക്ക് ചെയ്തിരുന്ന കാറിന് മുകളിലേക്ക് മരം ഒടിഞ്ഞുവീണിരുന്നു.
ദിവസവും നിരവധി ആളുകൾ വിവിധ ആവശ്യങ്ങൾക്കായി എത്തുന്ന പ്രധാന കേന്ദ്രമാണ് കോതമംഗലം റവന്യു ടവർ. എന്നാൽ ടവർ പരിസരത്ത് വളർന്നുപന്തലിച്ചു നിൽക്കുന്ന മരങ്ങളാണ് ഇപ്പോൾ ആശങ്കയാകുന്നത്.
കാറ്റ് ശക്തമാകുമ്പോൾ മരങ്ങളുടെ വലിയ കൊമ്പുകൾ ഒടിഞ്ഞുവീഴുന്നത് പതിവായിരിക്കുകയാണ്. കഴിഞ്ഞ ദിവസം ടവർ അങ്കണത്തിൽ പാർക്ക് ചെയ്തിരുന്ന കാറിന് മുകളിലേക്ക് മരം ഒടിഞ്ഞുവീണതും ആശങ്ക വർധിപ്പിച്ചു. വാഹനത്തിന് കേടുപാടുകൾ സംഭവിച്ചെങ്കിലും ആളപായമുണ്ടായില്ല.
അപകടകരമായി നിൽക്കുന്ന മരങ്ങളും ഉണങ്ങിയ കൊമ്പുകളും ടവർ പരിസരത്തുണ്ട്. ദിവസവും നിരവധി പേർ സഞ്ചരിക്കുന്നതും വാഹനങ്ങൾ പാർക്ക് ചെയ്യുന്നതുമായ സ്ഥലമായതിനാൽ മരങ്ങൾ വീണാൽ വലിയ അപകടത്തിന് സാധ്യതയുണ്ട്.
അപകടഭീഷണിയുയർത്തി നിൽക്കുന്ന മരങ്ങളും കൊമ്പുകളും പരിശോധിച്ച് ആവശ്യമായ നടപടികൾ സ്വീകരിക്കണമെന്നാണ് നാട്ടുകാരുടെയും ടവറിലെത്തുന്നവരുടെയും ആവശ്യം.
