കോതമംഗലം: വഴിയോര കച്ചവടക്കാരെ ഒഴിപ്പിക്കുന്ന നടപടിയുമായി കോതമംഗലം നഗരസഭ. ഗതാഗതത്തിനും പൊതുജനങ്ങള്ക്കും ബുദ്ധിമുട്ട് സൃഷ്ടിക്കുന്നുവെന്ന പരാതികളുടെ അടിസ്ഥാനത്തിലാണ് നടപടിയെന്ന് നഗരസഭ വൈസ് ചെയര്മാന് പ്രിന്സ് വര്ക്കി പറഞ്ഞു. ടൗണിലെങ്ങും നിരവധി വഴിയോര കടകള് പ്രവര്ത്തിച്ചിരുന്നു.
ബൈപ്പാസ് റോഡിലും മറ്റ് ചില റോഡുകളിലും കൂട്ടമായി വഴിയോരകച്ചവടം നടത്തുന്നതും പരാതിക്ക് കാരണമായി. കടകളെല്ലാം നീക്കം ചെയ്യാന് നടത്തിപ്പുകാര്ക്ക് അധികൃതര് നിര്ദേശം നല്കി. തുടര്ന്ന് ബഹുഭൂരിപക്ഷം കടകളും സ്വമേധയാ നീക്കം ചെയ്തു. മറ്റുള്ളവ നഗരസഭ പിടിച്ചെടുത്തു.
വൈകുന്നേരം മുതല് പ്രവര്ത്തിച്ചിരുന്ന തട്ടുകടകള് രാത്രി എട്ടോടെ തുറന്നാല് മതിയെന്നും നിര്ദേശം നല്കിയിട്ടുണ്ട്. അനധികൃത വഴിവാണിഭങ്ങള്ക്കെതിരെ വ്യാപകമായ പരാതി ഉയര്ന്നിരുന്നു. പോലീസും വിഷയം നഗരസഭ അധികൃതരുടെ ശ്രദ്ധയില്പ്പെടുത്തി. അനിയന്ത്രിതമായി വളര്ന്ന വഴിയോര കച്ചവടം ഇല്ലാതാക്കുന്നതില് മറ്റ് വ്യാപാരികളും ആശ്വാസത്തിലാണ്.
