പോത്താനിക്കാട്: പുളിന്താനത്ത് റോഡരികിലും ജലസ്രോതസുകളിലും രാത്രിയുടെ മറവില്‍ മാലിന്യം തള്ളുന്നതായി പരാതി. പോത്താനിക്കാട്പുളിന്താനം ഡീവിയേഷന്‍ റോഡില്‍ പുളിന്താനം പള്ളിക്കു സമീപം സ്ഥാപിച്ചിരിക്കുന്ന മിനി സംഭരണകേന്ദ്രത്തിന്(എംസിഎഫിന്) ചുറ്റും മാലിന്യക്കൂമ്പാരമാണ്. ചാക്കില്‍ കെട്ടിയാണ് ഇവിടെ മാലിന്യം ഉപേക്ഷിച്ചിരിക്കുന്നത്. ഇവിടെ എംസിഎഫ് കാടുപിടിച്ചുകിടക്കുകയാണ്. ദുര്‍ഗന്ധം വമിക്കുന്ന മാലിന്യക്കൂമ്പാരം നീക്കണമെന്നാണ് നാട്ടുകാരുടെ ആവശ്യം.
മാറാച്ചേരിക്കടവ് പാലത്തില്‍നിന്ന് കാളിയാര്‍ പുഴയിലേക്ക് അറവുമാലിന്യം ഉള്‍പ്പെടെ തള്ളുന്നതും പതിവാണ്. ഈ പ്രദേശത്ത് രാത്രിയില്‍ വെളിച്ചമില്ലാത്തത് മാലിന്യം തള്ളുന്നവര്‍ക്ക് സൗകര്യമാണെന്നാണ് നാട്ടുകാര്‍ പറയുന്നത്. പാലത്തിന് തൊട്ടുതാഴെയുള്ള പോത്താനിക്കാട് ശുദ്ധജല വിതരണ പദ്ധതിയുടെ പമ്പ് ഹൗസിന് സമീപത്തേക്കാണ് മാലിന്യം ഒഴുകിയെത്തുന്നത്.
കക്കടാശേരി-കാളിയാര്‍ റോഡില്‍ പുളിന്താനം പാലത്തില്‍നിന്നു തോട്ടിലേക്കും മാലിന്യം തള്ളാറുണ്ട്. വേനല്‍ രൂക്ഷമായതോടെ ഒഴുക്കു കുറഞ്ഞ ജല സ്രോതസുകളില്‍ മാലിന്യം കെട്ടിക്കിടക്കുന്നതു പകര്‍ച്ചവ്യാധികള്‍ക്കു കാരണമാകും. അധികൃതര്‍ നിസംഗത വെടിയണമെന്നും മാലിന്യങ്ങള്‍ ഉടന്‍ നീക്കം ചെയ്യണമെന്നുമാണ് നാട്ടുകാരുടെ ആവശ്യം.
