കോതമംഗലം: പരീക്കണ്ണി എസ്റ്റേറ്റില് സാമൂഹ്യ വിരുദ്ധര് ലോഡ്കണക്കിന് മാലിന്യം തള്ളിയ നിലയില്. പരീക്കണിക്ക് സമീപം ഉപ്പുകുഴിയിലുള്ള കോതമംഗലം രൂപതയുടെ റബര് എസ്റ്റേറ്റിനുള്ളില് പലയിടത്തായി എട്ടിലേറെലോഡ് മാലിന്യമാണ് നിക്ഷേപിച്ചിരിക്കുന്നത്. കെട്ടിട മാലിന്യങ്ങള് ഉള്പ്പെടെ പ്ലാസ്റ്റിക്കുകളുടെയും അജൈവമാലിന്യങ്ങളുടെയും കൂമ്പാരമാണ് ഇവിടെ കാണപ്പെട്ടത്. ഇ-മാലിന്യവുമുണ്ട്. എസ്റ്റേറ്റിലെ റബറും മറ്റ് മരങ്ങളും വെട്ടിനീക്കി റീപ്ലാന്റിന് ഇട്ടിരിക്കുന്നതിനാല് സൂപ്രണ്ടോ മറ്റ് ജോലിക്കാരോ ആരും തോട്ടത്തില് എത്തിയിരുന്നില്ല. ഇത്തരത്തില് ആളൊഴിഞ്ഞ സാഹചര്യം ആണെന്ന് മനസ്സിലാക്കിയാണ് മാലിന്യം നിക്ഷേപിച്ചിരിക്കുന്നത്.
മാലിന്യം തള്ളിയിരിക്കുന്നത് കഴിഞ്ഞ ദിവസമാണ് അധികൃതരുടെ ശ്രദ്ധയില്പ്പെട്ടത്. തോട്ടത്തില് അതിക്രമിച്ചുകയറി മാലിന്യം നിക്ഷേപിച്ചതിനെതിരെ ഊന്നുകള് പോലീസിലും, കവളങ്ങാട് പഞ്ചായത്ത് ഓഫീസിലും എസ്റ്റേറ്റ് അധികൃതര്പരാതി നല്കി. ഊന്നുകല് പോലീസ് സ്ഥലത്ത് എത്തി മാലിന്യക്കുമ്പാരങ്ങള്ക്കിടയില് നിന്ന് സ്ഥാപനങ്ങളുടെ പേരോ വിലാസമോ ലഭ്യമാകുമോയെന്നും, മാലിന്യം എത്തിച്ച വാഹനങ്ങള് കണ്ടെത്താന് പരിസരത്തെ റോഡുകള്ക്ക് സമീപമുള്ള വീടുകളുടെയും സ്ഥാപനങ്ങളുടെയും സിസിടിവിയും പരിശോധന നടത്തിവരികയാണ്.
കോതമംഗലം താലൂക്കിന്റെ പലഭാഗങ്ങളിലും അടുത്ത നാളുകളില് ഇത്തരത്തില് മാലിന്യം തള്ളുന്ന സംഭവങ്ങള് നിരന്തരം ആവര്ത്തിക്കുന്നുണ്ട്. പൈങ്ങോട്ടൂര് പഞ്ചായത്തില് ചാത്തമറ്റം കോളേജിന് സമീപം പാറമടയില് കഴിഞ്ഞ ദിവസം ഒരു ലോഡ് ഇ-മാലിന്യം നിക്ഷേപിച്ചത് പോത്താനിക്കാട് പോലീസ് പിടികൂടി വാഹനവും കസ്റ്റഡിയില് എടുത്തിരുന്നു. കടവൂരിന് സമീപം റമ്പര് തോട്ടത്തില് മാലിന്യം തള്ളിയത് മാലിന്യ കൂമ്പാരത്തില് നിന്നും കേറ്ററിങ്ങ് സ്ഥാപനത്തിന്റെ വിലാസം കണ്ടെത്തി പിടികൂടിയിരുന്നു.
നെല്ലിക്കുഴി പഞ്ചായത്തിന്റെ വിവിധയിടങ്ങളിലും ഇത്തരത്തില് പാറമടകളിലും ആളൊഴിഞ്ഞ തോട്ടങ്ങളിലും മാലിന്യം തള്ളിയ സംഭവങ്ങള് ഉണ്ടായിട്ടുണ്ട്. ദേശീയ പാതയില് കവളങ്ങാടിന്റെ പലഭാഗങ്ങളിലും വില്ലാഞ്ചിറയിലും റോഡരുകില് ലോഡ് കണക്കിന് കക്കൂസ് മാലിന്യവും അജൈവ മാലിന്യങ്ങളും തള്ളിയ സംവങ്ങളുണ്ട്. മാലിന്യങ്ങള് നീക്കം ചെയ്യാന് സ്ഥിരം കരാര് എടുക്കുന്ന സംഘങ്ങളാണ് ഇത്തരം മാലിന്യ നിക്ഷേപത്തിന് പിന്നില് പ്രധാനമായും പ്രവര്ത്തിക്കുന്നതെന്നും ആരോപണങ്ങളുണ്ട്. പോലീസും തദ്ദേശസ്വയംഭരണ സ്ഥാപനങ്ങളും അന്യോഷ്ണവും നിരീക്ഷണവും കൂടുതല് ശക്തമാക്കണമെന്നാണ് നാട്ടുകാരുടെ ആവശ്യം.
