കോതമംഗലം: പല്ലാരിമംഗലം പഞ്ചായത്തിലെ അടിവാട് ടൗണിലെ വ്യാപാരസ്ഥാപനത്തില്‍ വൈദ്യുതി വിതരണം തടസപ്പെടുത്തിയും സിസി ടിവി ക്യാമറ തിരിച്ചുവെച്ചും മോഷണശ്രമം. ഷട്ടറിന്റെ താഴ് തകര്‍ക്കാന്‍ കഴിയാത്തതിനെത്തുടര്‍ന്ന് മോഷ്ടാവ് പിന്മാറുകയായിരുന്നു. പോലീസ് കേസെടുത്ത് അന്വേഷണം ആരംഭിച്ചു.കോതമംഗലം താലൂക്കിലെ വിവിധ ചെറുടൗണുകളില്‍ കഴിഞ്ഞവര്‍ഷം സമാനമായ മോഷണപരമ്പര നടന്നിരുന്നു. വൈദ്യുതി വിച്ഛേദിച്ചും സിസി ടിവി ക്യാമറകള്‍ തകരാറിലാക്കിയും നിരവധി സ്ഥാപനങ്ങളില്‍ കവര്‍ച്ച നടത്തിയെങ്കിലും പ്രതിയെ പിടികൂടാനായിട്ടില്ല.
കോതമംഗലം, പോത്താനിക്കാട്, ഊന്നുകല്‍ സ്റ്റേഷനുകളില്‍ കേസുകള്‍ രജിസ്റ്റര്‍ ചെയ്തിട്ടും മോഷണം തുടരുന്നത് വ്യാപാരികളെ ആശങ്കയിലാക്കുന്നു. പല്ലാരിമംഗലം ശിവക്ഷേത്രത്തില്‍നിന്ന് പ്രതിഷ്ഠയുടെ വെള്ളി അങ്കിയുള്‍പ്പെടെ കവര്‍ന്ന് ഒരാഴ്ച തികയുംമുമ്പാണ് അടിവാട് ടൗണിലെ വ്യാപാരസ്ഥാപനത്തില്‍ മോഷണശ്രമം നടന്നത്. ക്ഷേത്രമോഷണത്തില്‍ പോത്താനിക്കാട് പോലീസിന്റെ അന്വേഷണം എങ്ങുമെത്തിയിട്ടില്ല. മോഷ്ടാക്കള്‍ വിലസുന്ന സാഹചര്യത്തില്‍ പോലീസ് ശക്തമായി രംഗത്തിറങ്ങണമെന്ന് വ്യാപാരികള്‍ ആവശ്യപ്പെട്ടു.
