കോതമംഗലം: റോഡ് നവീകരണവുമായി ബന്ധപ്പെട്ട് സ്വകാര്യ വ്യക്തികളുടെ വീടുകളിലേക്കുള്ള വഴി തടസപ്പെടുത്തുന്നതായി പരാതി. പകരം റാമ്പ് നിര്‍മിച്ച് നല്‍കുകയോ നിര്‍മാണം വേഗത്തിലാക്കുകയോ ചെയ്യുന്നില്ലെന്നും ആക്ഷേപമുണ്ട്. നേര്യമംഗലം വില്ലാഞ്ചിറയില്‍ 25 ഓളം കുടുംബങ്ങള്‍ 75 വര്‍ഷത്തിലധികമായി ഉപയോഗിച്ച് വന്നിരുന്ന വീടുകളിലേക്ക് പ്രവേശിക്കുന്ന വഴികള്‍ തടസപ്പെടുത്തിയാണ് നാഷണല്‍ ഹൈവേ പുനര്‍നിര്‍മാണം നടക്കുന്നത്. ജനപ്രതിനിധികളായുള്ള ചര്‍ച്ചയ്ക്കിടെ ഇവര്‍ക്കെല്ലാം റാന്പ് കെട്ടി വഴി നല്‍കാമെന്ന് ഉറപ്പ് നല്‍കിയിരുന്നെങ്കിലും ഇതെല്ലാം ലംഘിക്കപ്പെടുകയാണ്. കഴിഞ്ഞദിവസം പൊളിച്ചിട്ട വഴിയിലൂടെ സ്വന്തം വീട്ടിലേക്ക് ഇറങ്ങിപ്പോയ രാധ എന്ന വീട്ടമ്മ വീണ് കൈ ഒടിഞ്ഞ് ചികിത്സതേടിയിരുന്നു. നിര്‍മാണത്തിന്റെ പേരില്‍ പ്രദേശവാസികളുടെ കുടിവെള്ള പൈപ്പ് ലൈനുകള്‍ തകര്‍ന്ന് കിടക്കുകയാണ്. ശുദ്ധജലം പോലും കിട്ടാത്ത അവസ്ഥയാണുള്ളത്. ഇത് കടുത്ത മനുഷ്യാവകാശ ലംഘനമാണെന്ന് പഞ്ചായത്തംഗവും മുന്‍ പഞ്ചായത്ത് പ്രസിഡന്റുമായ സൈജന്റ് ചാക്കോ പറഞ്ഞു. ജയന്‍ പൈനാപ്പിള്ളില്‍, രാധ ഇടപേതില്‍, നാരായണന്‍ തേക്കനാട്ടുകുടിയില്‍, കൃഷ്ണന്‍കുട്ടി തടത്തിക്കുന്നില്‍, ജോണ്‍സണ്‍ കോക്കണ്ടത്തില്‍, ജോയ് പൗലോസ് പുല്ലന്‍, ബിലാല്‍, മുഹമ്മദ്, ജോസ് കോക്കണ്ടത്തില്‍, ജോസ് മണ്ണത്താന്നിക്കല്‍, കബീര്‍, സാന്റീ മിറ്റത്താനിക്കല്‍, സജി ചാക്കോ, കല്ലന്പള്ളി, ചാക്കോ ദേവസ്യ, നാസര്‍ അറമംഗലം, ജാന്‍സി ജയേഷ്, ആലീസ് ജോര്‍ജ് കല്ലന്പള്ളി, ബോസ് താഴത്തോട്ട് എന്നിവരുള്‍പ്പെടെ 25 കുടുംബങ്ങള്‍ക്കാണ് വഴി തടസപ്പെട്ടിരിക്കുന്നത്. സഞ്ചാര സ്വാതന്ത്ര്യം നിഷേധിച്ചതില്‍ കക്ഷി രാഷ്ട്രീയ വ്യത്യാസമില്ലാതെ പ്രതിഷേധം സംഘടിപ്പിക്കുമെന്ന് പ്രദേശവാസികള്‍ പറഞ്ഞു.
