കോതമംഗലം : നെല്ലിക്കുഴി പഞ്ചായത്തിലെ പഞ്ചായത്തുംപടി- നായ്ക്കൻ നഗർ -ഇടനാട് വികാസ് നഗർ റോഡ് നിർമ്മാണത്തിന് സർക്കാരിന്റെ പ്രത്യേക അനുമതി ലഭ്യമായതായി ആന്റണി ജോൺ എംഎൽഎ അറിയിച്ചു. നെല്ലിക്കുഴി പഞ്ചായത്ത് ഓഫീസിന് സമീപം ആലുവ – മൂന്നാർ റോഡിൽ നിന്നും ആരംഭിച്ച് പെരിയാർ വാലി കനാൽ ബണ്ട് റോഡിൽ എത്തിച്ചേരുന്ന പ്രധാന റോഡാണ് ഇപ്പോൾ നാട്ടുകാരുടെ സഹകരണത്തോടെ വീതി വർദ്ധിപ്പിച്ച് നിർമ്മിക്കാൻ തീരുമാനിച്ചത്.
റോഡിന്റെ നിർമ്മാണത്തിനായി എംഎൽഎ ഫണ്ടിൽ നിന്നും 16.92 ലക്ഷം രൂപ അനുവദിച്ചിരുന്നു. എംഎൽഎ ഫണ്ട് വിനിയോഗത്തിലെ മാർഗ്ഗനിർദ്ദേശങ്ങൾ ഫണ്ട് വിനിയോഗത്തിന് തടസമായിരുന്നു. റോഡിന്റെ പ്രാധാന്യം കണക്കിലെടുത്തു റോഡ് നിർമ്മാണത്തിന് എം എൽ എ ഫണ്ട് വിനിയോഗിക്കുന്നതിന് പ്രത്യേക അനുമതി നൽകണമെന്ന് ആവശ്യപ്പെട്ട് സർക്കാരിന് കത്ത് നൽകിയിരുന്നു. ഈ ആവശ്യം അംഗീകരിച്ചതിന്റെ അടിസ്ഥാനത്തിലാണ് ധനകാര്യ വകുപ്പ് റോഡ് ടൈൽ വിരിച്ച് നവീകരിക്കുന്നതിന് പ്രത്യേക അനുമതി നൽകിയിട്ടുള്ളത്. ടെൻഡർ നടപടികൾ ഉടൻ പൂർത്തീകരിച്ച് റോഡിന്റെ നിർമാണം ആരംഭിക്കും.
