ന്യൂഡല്‍ഹി: വയനാട് ഉരുള്‍പൊട്ടല്‍ ദേശീയ ദുരന്തമായി പ്രഖ്യാപിക്കണമെന്ന് ആവശ്യപ്പെട്ട് ഡീന്‍ കുര്യാക്കോസ് എംപി ലോക്‌സഭയില്‍ അടിയന്തിര പ്രമേയത്തിന് നോട്ടീസ് നല്‍കി. ചിന്തിക്കാന്‍ കഴിയാവുന്നതിലും വലിയ ദുരന്തമാണ് വയനാട്ടില്‍ സംഭവിച്ചിരിക്കുന്നത്. മൃതദേഹങ്ങള്‍ പുഴയില്‍ ഒഴുകിനടക്കുന്ന ഭയാനകമായ കാഴ്ചയാണ് നമ്മള്‍ കണ്ടുകൊണ്ടിരിക്കുന്നത്. വയനാടിന് സമാനമായ രീതിയില്‍ നിരന്തരം ദുരന്തം പേമാരിപോലെ പെയ്തിറങ്ങുന്ന മറ്റൊരുനാടാണ് ഇടുക്കിയും.
ഭീതിജനകമായ സാഹചര്യമാണ് നിലനില്‍ക്കുന്നത് ഈ സാഹചര്യത്തില്‍ വിഷയം സഭ നിറുത്തിവച്ചു ചര്‍ച്ചചെയ്യണമെന്നും, കേന്ദ്ര ആഭ്യന്തരമന്ത്രി അമിത് ഷായുടെ നേത്രത്വത്തില്‍ മന്ത്രിതല സംഘം വായനാട് സന്ദര്‍ശിച്ച് സ്തിഥിതിഗതികള്‍ വിലയിരുത്തണമെന്നും, വയനാട് ദുരന്തം ദേശീയ ദുരന്തമായി പ്രഖ്യാപിക്കണമെന്നും, ആവശ്യപ്പെട്ടാണ് ഡീന്‍ കുര്യാക്കോസ് എം.പി ലോക്‌സഭയില്‍ അടിയന്തിര പ്രമേയത്തിന് നോട്ടീസ് നല്‍കിയത്. അടിയന്തിര പ്രമേയത്തിന് സ്പീക്കര്‍ അവതരണാനുമതി നിഷേധിച്ചതിനെത്തുടര്‍ന്ന് ശൂന്യ വേളയില്‍ വിഷയം വീണ്ടും ഉന്നയിച്ചു .
