കവളങ്ങാട്: കവളങ്ങാട് ഗ്രാമപഞ്ചായത്ത് 34 കോടി രൂപയുടെ ബഡ്ജറ്റ് അംഗീകരിച്ചു.25 ലക്ഷം മിച്ചം വരുന്ന ബഡ്ജറ്റ് വൈസ് പ്രസിഡൻ്റ് ജിൻസിയ.ബിജു അവതരിപ്പിച്ചു. എല്ലാവർക്കും ഭവനം എന്ന ലക്ഷ്യത്തിലേക്ക് എത്തും വിധം ലൈഫ് ഭവനപദ്ധതിക്ക് പത്ത് കോടി രൂപ നീക്കിവച്ചു. കാർഷിക മേഖലയുടേയും കായിക മേഖലയുടേയും സമഗ്ര വികസനം, മാലിന്യ സംസ്കരണ പരിപാടികൾ, കരിമണൽ – ചെമ്പൻ കുഴി അഞ്ച് കിലോമീറ്റർ ഫെൻസിംഗിന് പത്ത് ലക്ഷം, നെല്ലിമറ്റം ടൗണിൽ പുതിയ ഷോപ്പിംഗ് കോംപ്ലക്സ്, ഊന്നുകൽ സ്റ്റേഡിയത്തിൻ്റെ വിപുലീകരണത്തിന് മുപ്പത് ലക്ഷം, ക്ഷീരവികസനം, ടൂറിസം മേഖലകൾക്കുള്ള നൂതന പദ്ധതികൾ എന്നിവ വിഭാവനം ചെയ്യുന്നതാണ് പുതിയ ബജറ്റ് പ്രഖ്യാപനം.
നേര്യമംഗലം പി.എച്ച്.സിയിൽ എക്സറേ, ഇ.സി.ജി.യൂണിറ്റുകൾ, എല്ലാ അങ്കണവാടികളും, വിദ്യാർത്ഥികളും സ്മാർട്ട് ആക്കുക, നേര്യമംഗലം ബോട്ട് ജെട്ടിയോട് ചേർന്ന് കംഫർട്ട് സ്റ്റേഷനും, കോഫി ഹൗസും സ്ഥാപിക്കൽ, നേര്യമംഗലം ഷോപ്പിംഗ് കോംപ്ലക്സ്, ഊന്നു സ്റ്റേഡിയം നിർമ്മാണം, കുടിവെള്ള പദ്ധതി തുടങ്ങീയ അടിസ്ഥാന വികസനത്തിൽ ശ്രദ്ധ പുലർത്തുന്നതാണ് ബജറ്റ്. രാവിലെ പഞ്ചായത്ത് ഹാളിൽ നടന്ന ബജറ്റ് അവതരണത്തിന് പ്രസിഡൻ്റ് സൈജൻ്റ് ചാക്കോ അദ്ധ്യക്ഷത വഹിച്ചു. സ്ഥിരം സമിതി അദ്ധ്യക്ഷൻമാരായ റ്റി.എച്ച്.നൗഷാദ്, ഷിബു. പടപ്പറമ്പത്ത്, സൗമ്യ ശശി, ഗ്രാമ പഞ്ചായത്തംഗങ്ങൾ, സെക്രട്ടറി ഇ.കെ.കൃഷ്ണൻകുട്ടി എന്നിവർ പങ്കെടുത്തു.
ഫോട്ടോ: കവളങ്ങാട് പഞ്ചായത്ത് ബജറ്റ് അവതരണം വൈസ്.പ്രസിഡൻ്റ് ജിൻസിയ.ബിജു അവതരിപ്പിക്കുന്നു.
