- ജെറിൽ ജോസ് കോട്ടപ്പടി
കോതമംഗലം : കോട്ടപ്പടി പഞ്ചായത്തിലെ ചേറങ്ങനാൽ -വാവേലി റോഡിൽ അപകടഭീഷണി ഉയർത്തി ആൽമരം. നിരവധി വാഹനങ്ങളും കാൽനട യാത്രക്കാരും കടന്നു പോകുന്ന വഴിയിൽ അപകടഭീഷണി ഉയർത്തി ആൽമരം നിൽക്കാൻ തുടങ്ങിയിട്ട് നാളുകളായി. ആൽമരത്തിന്റെ അടിഭാഗം കാലപ്പഴക്കം കൊണ്ട് ദ്രവിച്ച അവസ്ഥയിലാണ്. നാളുകൾക്കു മുന്നേ റോഡ് സൈഡിൽ സ്ഥിതി ചെയ്യുന്ന വീടിനു ഭീഷണി ആയതിനാൽ കൊമ്പുകൾ ഇറക്കി നിർത്തിയിരുന്നു. മാസങ്ങൾക്ക് മുന്നേ റോഡ് പണിയുമായി ബന്ധപ്പെട്ടു വേരുകൾ അറ്റുപോയതിനാൽ മരത്തിനു ഉണക്ക് സംഭവിച്ചു . ഏത് നിമിഷവും നിലം പതിക്കാവുന്ന അവസ്ഥയിലാണ്.
ആധുനിക നിലവാരത്തിൽ ഉള്ള റോഡ് പണിയിൽ പലപ്പോഴും റോഡ് സൈഡിൽ നിൽക്കുന്ന മരങ്ങളുടെ വേരുകൾ അറ്റുപോകാറുണ്ട്. റോഡ് സൈഡിൽ നിൽക്കുന്ന അപകടകരമായ മരങ്ങൾ മുറിച്ചു മാറ്റണമെന്നാണ് നാട്ടുകാരുടെ ശക്തമായ ആവശ്യം. വഴിയരികിൽ നിൽക്കുന്ന വൻമരങ്ങൾ കടപുഴകി വീഴുന്നത് കോതമംഗലം മണ്ഡലത്തിലെ നിത്യകാഴ്ചയാണ്.
