- ജെറിൽ ജോസ് കോട്ടപ്പടി
കോട്ടപ്പടി : ബി.എം.ബി.സി നിലവാരത്തിൽ ടാറിങ് കഴിഞ്ഞ റോഡ് രണ്ടു മാസമായപ്പോഴേക്കും പൈപ്പ് പൊട്ടി റോഡിനു നടുവിൽ കൂടി വെള്ളം ഒഴുകി തുടങ്ങി. കോട്ടപ്പടി പഞ്ചായത്തിലെ ചേറങ്ങനാൽ ജംഗ്ഷനിലാണ് സംഭവം. ആധുനിക നിലവാരത്തിൽ പണിത റോഡ് കുത്തിപ്പൊളിച്ച് പൈപ്പിന് ചോർച്ച അടക്കേണ്ട അവസ്ഥയിലാണ്. കോതമംഗലം നിയോജകമണ്ഡലത്തിൽ ആധുനിക നിലവാരത്തിൽ ചെയ്യുന്ന എല്ലാ റോഡുകളിലും ഇതേ അവസ്ഥ തന്നെയാണ് വരാൻ പോകുന്നത്. ബി. എം ടാറിങ് പൂർത്തിയാക്കിയ കോട്ടപ്പടി -ഇരുമലപ്പടി റോഡിൽ പലയിടത്തും പൈപ്പ് പൊട്ടി വെള്ളം ചോർന്നു പോയിരുന്നു. നാട്ടുകാരുടെ നിരന്തരമായ പരാതിയെ തുടർന്ന് വാട്ടർ അതോറിറ്റി തന്നെ റോഡ് കുത്തിപ്പൊളിച്ച് ചോർച്ച അടച്ചു. ആധുനിക നിലവാരത്തിൽ പൂർത്തിയാക്കിയ റോഡ് റോഡ് പണി കഴിഞ്ഞ ഉടനെ തന്നെ കുത്തി പൊളിക്കുന്നത് നാട്ടുകാരുടെ ഏറെ വിമർശനങ്ങൾക്ക് ഇടയാക്കുന്നുണ്ട്.
റോഡ് ക്രോസ് പോയി ചെയ്തു പോകുന്ന വാട്ടർ അതോറിറ്റിയുടെ പൈപ്പുകൾ ടാറിങ് സമയത്ത് വലിയ റോഡുറോളറുകൾ പോകുമ്പോഴും ആധുനിക രീതിയിലുള്ള വൈബ്രേറ്റർ മെഷീൻ പ്രവർത്തിക്കുമ്പോഴും റോഡിനു താഴെ പോകുന്ന പഴകിയ പൈപ്പുകൾക്ക് തകരാർ സംഭവിക്കുന്നതിലാണ് റോഡ് പണി കഴിയുമ്പോൾ തന്നെ വെള്ളം ഉറവ പോലെ റോഡിൽ നിന്നും വരുന്നതിനുള്ള പ്രധാന കാരണമെന്നാണ് വിദഗ്ധ അഭിപ്രായം. ആധുനികരീതിയിലുള്ള റോഡ് പണിയുമ്പോൾ റോഡിനു താഴെക്കൂടി ക്രോസ്ചെയ്തു പോകുന്ന വാട്ടർ അതോറിറ്റിയുടെ പല പൈപ്പുകളും കാലപ്പഴക്കം കൊണ്ട് ബലക്ഷയം സംഭവിച്ചതാണെന്ന് ഉദ്യോഗസ്ഥർ മനപ്പൂർവ്വം മറക്കുന്നതാണ് പ്രധാന കാരണമെന്നാണ് പൊതുവേയുള്ള ആക്ഷേപം.
