കോതമംഗലം : സാമൂഹ്യസേവന രംഗത്ത് കോതമംഗലം താലൂക് കേന്ദ്രീകരിച്ച് ഒരു പതിറ്റാണ്ടിലധികമായി നിറസാന്നിധ്യത്തോടെ നിൽക്കുന്ന സേവാകിരൺ ചാരിറ്റബിൾ സൊസൈറ്റിയുടെ അനുബന്ധ പദ്ധതിയായ വാരപ്പെട്ടി ഗ്രാമ സേവാസമിതിയുടെ നേതൃത്വത്തിൽ ആരംഭിക്കുവാൻ പോകുന്ന വിവിധ സേവന പദ്ധതികൾക്കായുള്ള സേവാ കേന്ദ്രത്തിന് വാരപ്പെട്ടി ഇളങ്ങവം തേക്കുംകാട്ടിൽ ശ്രീ. രാധാകൃഷ്ണൻ അദ്ദേഹത്തിന്റെ മാതാവ് ലക്ഷ്മിക്കുട്ടിയമ്മയുടെ സ്മരണാർത്ഥം 10 സെന്റ് സ്ഥലം ഇഷ്ടദാനം നൽകിക്കൊണ്ട് സമർപ്പണത്തിന്റെ ഉദാത്തമായ മാതൃകയായി.
വാരപ്പെട്ടി ഗ്രാമപഞ്ചായത്ത് കമ്യൂണിറ്റി ഹാളിൽ വച്ച് നടന്ന ചടങ്ങിൽ രാഷ്ട്രീയ സ്വയംസേവക സംഘം സഹ പ്രാന്ത പ്രചാരക് എ വിനോദ് ഭൂമിയുടെ പ്രമാണം രാധാകൃഷ്ണനിൽ നിന്നും ഏറ്റുവാങ്ങി. ഗ്രാമ സേവാസമിതി പ്രസിഡന്റ്‌ പ്രിയ സന്തോഷ്‌ അധ്യക്ഷത വഹിച്ച പരിപാടിയിൽ വിശ്വ സേവാഭാരതി സംയോജക് എ ആർ മോഹൻ മുഖ്യ പ്രഭാഷണം നടത്തി. സേവാകിരൺ രക്ഷാധികാരി ഇ എൻ നാരായണൻ, സേവാകിരൺ പ്രസിഡന്റ്‌ കെ എൻ ജയചന്ദ്രൻ, ജില്ലാ സംഘചാലക് ഇ വി നാരായണൻ, ജില്ലാ ഗ്രാമ വികാസ് സംയോജക് പി ആർ സിജു, ദീപാ രാധാകൃഷ്ണൻ തുടങ്ങിയവർ സംസാരിച്ചു.
