കോതമംഗലം: കോതമംഗലം, മൂവാറ്റുപുഴ ബൈപ്പാസ് പദ്ധതികളുടെ അനിശ്ചിതത്വം അവസാനിപ്പിച്ച് പദ്ധതി യാഥാര്ഥ്യമാക്കണമെന്ന് ഡീന് കുര്യാക്കോസ് എംപി പത്രസമ്മേളനത്തില് ആവശ്യപ്പെട്ടു. ദേശീയപാത അഥോറിറ്റി കഴിഞ്ഞ വര്ഷം അനുമതി നല്കിയ ബൈപ്പാസ് പദ്ധതികളുടെ സ്ഥലമെടുപ്പ് നടപടികള് ഉടന് ആരംഭിക്കണമെന്നും എംപി ആവശ്യപ്പെട്ടു. 2023 ഡിസംബറില് പ്രസിദ്ധപ്പെടുത്തിയ 3എ വിജ്ഞാപനം 2024 ഡിസംബറില് അവസാനിച്ചു. കഴിഞ്ഞ സാന്പത്തിക വര്ഷത്തില് തന്നെ സമയബന്ധിതമായി ത്രീഡി വിജ്ഞാപനം പുറപ്പെടുവിച്ച് സ്ഥലം ഏറ്റെടുക്കല് നടപടികള് ആരംഭിക്കണമെന്നതായിരുന്നു കേന്ദ്ര സര്ക്കാര് നിലപാട്. എന്നാല് കൃത്യസമയത്ത് എല്എ തുക കണക്കാക്കി നല്കാനോ സമയബന്ധിതമായി ത്രിഡി വിജ്ഞാപനം പുറപ്പെടുവിക്കാനോ സംസ്ഥാന സര്ക്കാരിന് സാധിച്ചില്ലെന്ന് എംപി കുറ്റപ്പെടുത്തി.
ഭൂമി ഏറ്റെടുക്കലിനായി 385 കോടിയാണ് പുനര് നിശ്ചയിച്ചിരിക്കുന്നത്. നേരത്തെ 575 കോടി കണക്കാക്കി നല്കിയത് ദേശിയപാത അഥോറിറ്റി അംഗീകരിച്ചിരുന്നില്ല. അന്ന് സംസ്ഥാന സര്ക്കാര് വരുത്തിയ വീഴ്ച്ചയ്ക്ക് വലിയ വില കൊടുക്കേണ്ടിവന്നിരിക്കുകയാണ്. ഭൂമി ഏറ്റെടുക്കുന്നതിന് 385 കോടിയില് അധികമായി വന്നാല് അത് സംസ്ഥാനം വഹിക്കണമെന്ന ദേശിയപാത അഥോറിറ്റി ചെയര്മാന് ചിഫ് സെക്രട്ടറിക്ക് അയച്ച കത്തില് വ്യക്തമാക്കിയിരുന്നു. ചീഫ് സെക്രട്ടറി സംസ്ഥാനത്തിന് അത് സാധ്യമല്ലയെന്ന് മറുപടി നല്കി. തുടര്ന്ന് ഡല്ഹിയില് മുഖ്യമന്ത്രി പിണറായി വിജയന് ഉള്പ്പെടെ പങ്കെടുത്ത ഉന്നതതല യോഗത്തിലും ഇതേ നിലപാട് ആവര്ത്തിച്ചു. കേന്ദ്ര ഉപരിതല ഗതാഗത മന്ത്രി നിതിന് ഗഡ്കരി സാധ്യമാകുന്ന എല്ലാ നിലയിലും ഭൂമി ഏറ്റെടുക്കല് തുക കുറയ്ക്കാന് നിര്ദേശം നല്കിയിരിക്കുകയാണ്. ഇതിനു പരിഹാരമായി എലിവേറ്റഡ് പാത ഉള്പ്പെടെ പരിഗണിച്ച് നിര്മാണം വേഗത്തിലാക്കാനാണ് കേന്ദ്ര മന്ത്രി നിര്ദേശിച്ചിരിക്കുന്നത്. നിലവില് 3എ വിജ്ഞാപനം റദ്ദായി. നേരത്തെ നിശ്ചിയിക്കപ്പെട്ട അലൈന്മെന്റില് തന്നെ രണ്ട് സര്ക്കാരുകളും യോജിച്ച് പദ്ധതി നടപ്പാക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന് കത്ത് നല്കിയിട്ടുണ്ടെന്നും ഡീന് കുര്യാക്കോസ് എംപി പറഞ്ഞു.
