കോതമംഗലം: കുടുംബത്തിന് നെടുംതൂണായി നില്ക്കേണ്ടവരെല്ലാം കിടപ്പു രോഗികളായി മാറിയതോടെ ദുരിതത്തിലായിരിക്കുകയാണ് ഒരു കുടുംബം. കീരംപാറ പഞ്ചായത്ത് മൂന്നാം വാര്ഡില് താമസിക്കുന്ന പുന്നേക്കാട് സ്വദേശി മംഗലത്ത് സജി കുര്യാക്കോസ് (54), ഭാര്യ മിനി ചാക്കോ, ഇവരുടെ രണ്ട് പെണ്മക്കള് എന്നിവരടങ്ങുന്ന കുടുംബത്തിനാണ് ദുരവസ്ഥ.ക്യാന്സറിന്റെ നാലാം ഘട്ടത്തില് ചികിത്സ തുടരുന്ന വീട്ടമ്മയാണ് മിനി. കുടുംബത്തിന്റെ ഏക ആശ്രയം ആയിരുന്ന ഭര്ത്താവ് സജിക്ക് പ്രമേഹം കൂടി കിടപ്പിലായതോടെ പണിക്ക് പോകാനാവുന്നില്ല. രണ്ട് പെണ്മക്കളാണ് ഇവര്ക്കുള്ളത്. മൂത്ത മകള് 100 ശതമാനം വൈകല്യമുള്ളവള്.രണ്ടാമത്തെ മകള് പത്താം ക്ലാസില് പഠിക്കുന്നു.
അവരുടെ ഭാവിയും ഇപ്പോള് അനിശ്ചിതത്വത്തിലായിരിക്കുകയാണ്.
പണി പൂര്ത്തിയാക്കാത്ത വീട് ജപ്തി ഭീഷണിയിലുമാണ്.ബാങ്കുകാര് വന്ന് ജപ്തി നോട്ടീസ് പതിച്ചതോടെ ഏത് നിമിഷവും വീട്ടില് നിന്നിറങ്ങേണ്ട അവസ്ഥയാണ്. രണ്ടു വര്ഷമായി ക്യാന്സറിനോട് പോരാടുകയാണ് മിനി. ഇപ്പോള് രോഗം നാലാം ഘട്ടത്തിലാണ്. എട്ടു കീമോ ചികിത്സകള് ഇതിനകം പൂര്ത്തിയായി. ഇനി രക്ഷയ്ക്കായി ശസ്ത്രക്രിയ അനിവാര്യമാണ്ശ. എന്നാല് ശസ്ത്രക്രിയയ്ക്ക് ആവശ്യമായ 6.5 ലക്ഷം രൂപ കണ്ടെത്താന് ഈ കുടുംബത്തിന് കഴിയുന്നില്ല. ഒരോ മാസവും മരുന്നുകള്ക്ക് മാത്രം 6000 രൂപ ചെലവാകുമ്പോഴാണ് ബാങ്കിന്റെ ജപ്തി ഭീഷണിയും. ഇനി എന്ത് ചെയ്യണമെന്ന് അറിയില്ലെന്നും, ഏത് നിമിഷവും ബാങ്കുകാര് വീട്ടില് നിന്നിറക്കി വിടും എന്നും സജി പറഞ്ഞു.
ജീവിക്കാന് വേണ്ടി പോരാടുന്ന ഈ കുടുംബത്തിന് നമ്മുടെ കരുതലും കരുണയും ആവശ്യമാണ്. സഹായിക്കാന് മനസ്സുള്ളവര് സഹായഹസ്തം നീട്ടുമെന്നാണ് കുടുംബത്തിന്റെ പ്രതീക്ഷയും.
